GTE-mi susoqarnersoq Atassutip paaserusuppaa
Malunnarpoq ingerlatsinerup pitsaanerpaanissaanik sulissutiginninniarnermi ingerlatsivimmi eqqissilluni sulisinnaaneq angujuminaatsinneqartoq, taamaattoqarneralu Atassutip ernumanartoqartikkaa inuussutissarsiornermut naalakkersuisumut Siverth K. Heilmannimut apeqquteqaammi allassimavoq.
– Isumarput naapertorlugu pissutsit arlallit maannamut ersersitsipput ingerlatseqatigiiffimmi eqqissiviilliortoqartoq aammalu ingerlatseqatigiiffiup takornariaqarnermut aammalu inuussutissarsiornermut periuseriniagai pillugit ataatsimoortitsiniaruminaatsitsisoqartoq, ilaatigut eqqissiviilliortoqarneranut takussutissaavoq ingerlatseqatigiiffiup maj 2007-mi nalinginnaasumik ataatsimeersuarnerata kingorna sulisut siulersuisunilu ilaasortat pingaarutilimmik inissisimasut arlallit tunuarsimanerat, Atassutip inatsisartuni ilaasortai allapput.
Taakku paaserusuppaat sorpiaat pilersaarutit GTE-mi eqqissiviilliornermik pilersitsisimasut eqqissisoqarnissaalu anguniarlugu Naalakkersuisut qanoq iliuuseqarniarnersut.
Atassutip aammam paaserusuppaa Greenland Venture aamma GTE pillugit nalilersuisoqarnissaanik piumasaqarnerminnut atatillugu qanoq angusaqartoqassasoq naalakkersuisut sumik naatsorsuutiginninersut.