S-61-ip Ilulissani ajutoorneranut Air Greenland akisussaannginnerarpoq
S-61-ip aserfallatsaalineqarnissaanut najoqqutassat tamaasa timmisartortitseqatigiiffiup malissimavai. Ilulissani ajutoornermut akisussaasuuvoq Canadami suleqatigisaq.
Upernaaq Ilulissat eqqaanni helikopterip sakkortuumik minneranut atatillugu Havarikommissionip nalunaarusiarigallataata tusagassiorfinnit nassuiarneqarnera Air Greenlandip akerlilerpaa. Timmisartortitseqatigiiffik malillugu takutinniarneqarsimavoq kukkuneq Air Greenlandimiittoq.
Taamaanngilarli, teknikkimut pisortaq Peter Bjerre oqarpoq. Taassuma tikkuarpaa Havarikommissionip nalunaarusiamini erseqqissaraa, kukkuneq pisimasoq Air Greenlandip ukiorpassuarni Canadami suleqatigisaani helikopterip misissorneqarnerani motooriata katiterneqarnerani. Tamatuma naggataatigut kingunerisimavaa motoorip ikummatissamik pilersorneqarunnaarnera, taamaattumillu unittoorluni, helikopteri nunap qaavanit meterit aappaata affaata missaanik qullasitsigisumiitillugu, piffimmi milernermi pingaarutilimmi, taamaattumillu helikopteri sakkortoorujussuarmik missimavoq. Tamanna timminerup nalaani pisimasuuppat ilaasut eqqorneqarsimanavianngikkaluarput, Peter Bjerre oqarpoq.
Havarikommissionip misissuinini ingerlateqqissavai, aammalu Air Greenland suleqatigisaa misissuiffigeqqissaarneqassaaq, qanoq pisoqarsimanera iternga tikillugu paasiniarlugu. Peter Bjerre naapertorlugu misissuinerit ingerlanneqarneranni selskabi aserfallatsaaliinernik taamaattunik ingerlatseqqusaanngilaq.