Kujataani ingerlatsivik takornarialerisoq nutaaq
Kujataani ingerlatsivik takornarialerisoq nutaaq ateqarpoq Tasermiut South Greenland Expeditions, Qassiarsummilu angerlarsimaffeqarluni.
Spaniamiut Ramon Larramende, Javi Galvez-ilu piginneqatigiiffimmik aallartisuusut, aasaq manna takornariat 400-t pallillugit tikeraartorissavaat. Takornariat amerlanersaat Spaniaminngaanneersuupput aammattaarli Frankrig-imiit Italiamiillu takornariaqassaaq.
Kalaallit Nunaannut sungiussisimaqisunut aallartisartunut marluusunut, takorluukkamiit piviusunngortitsinissamut aqqut takisimallunilu pikkunarsimaqaaq. Naak ukiut qulikkuutaat Kujataanut takornariartitsisarsimagaluarlutik, ingerlatsivimmik ammaaniarnermi akuersissummut ukioq ataaseq pallillugu utaqqisimalerput.
- Soorunalimi suliffeqarfipput Kalaallit Nunaanni allattorsimassaaq, piginneqatigiiffimmilli maani ammaanissaq allaffissornikkut oqimaassimaqaaq. Kisianni maannakkorpiaq inatsisilerisutta Finn Meinelip nalunaarutigivaa Erhvervs- og Selskabsstyrelsimut piginneqatigiiffittut allatsinnerput iluatsittoq, Javi Galvez nuannaarluni oqarpoq.
Aasami takornariaajumaartussat Tasermiut South Greenland Expeditions-ip “The Leif Eriksson Hostel-imi", tuperluni unnuiffinni, sumiiffimmilu savaatilinni najugaqartissavai. Tasermiut South Greenland Expeditions ilaqutariinnut savaatilinnut 20-inut attaveqarpoq.