Nunatsinnit radio USA-mi naalaartartorpassuarnut
USA-mi naalaartartut 39 millionit arfininngormat Kalaallit Nunaannik ilisimasaqarnerulernissaminnut periarfissinneqarput.
Amerikamiu angalalluni tusagassasiortartoq aallakaatitassiortorlu, Peter Greenberg, Nuummi kulturikkut illorsuarmit Katuamit nalunaaqutaq 12.00-imiit 14.00-ip tungaanut toqqaannartumik aallakaatitsivoq. Aliikkusersuinerlu USA-mi radioqarfitsigut 136-itigut aallakaatinneqarpoq.
Peter Greenberg angalanissamini Nunatsinniinnissaminilu aningaasartuutiminut ilaatigut Air Greenlandimit aamma Kalaallit Nunaanni Takornariaqarnermut Inuussutissarsiuteqarnermullu Siunnersuisoqatigiinnit (GTE) aningaasaliiffigineqarsimavoq. Allakaatitsinermi ilaatigut Kimmernaq Kjeldsen erinarsukkaminik nuannarineqarluartunik marlussunnik aamma atuisoq apersorneqarpoq. Aallakaatitsinermi peqataasut allat ilaatigut tassaapput professor, Søren Rysgaard, silaannaap allanngoriartornera pillugu apersorneqartoq kiisalu Katuami pisortaq, Juaaka Lyberht, kalaallit kulturianut tunngasuteqartunik eqqartuisoq.