Ingerlatseqatigiiffinni arnat ikittuinnaapput

Ingerlatseqatigiiffinni ataasiakkaani soorlu TELE Greenlandimi, Greenland Venturemi aamma Grønlandshavnens Ejendommemi siulersuisuni ilaasortat arnartaqanngillat. Illua´tungaatigut suliffeqarfiit soorlu Great Greenlanditut aamma Inissiaatileqatigiiffik INI-tut ittut suiaassutsinut tunngatillugu naligiissitaanissamik piumasaqaatinik naammassinnittuupput.

Taakku siulersuisuminni pingasunik sisamanilluunniit arnartaqarput.

Peqqissaasut kattuffiata siulittaasua, Birtha Bianco aviisimut oqarpoq, siulersuisuni arnat piginnaanillit amerlanerit ilaasortanngortissagaanni Naalakkersuisut isummersortaasiat allanngortariaqartoq.

- Naalakkersuisunuku arnanut siulersuisuni ilaasortanut isummersortarnerat allanngortittariaqartoq. Siulersuisuni kikkut toqqagaasarnersut qiveriaanni qinigaasut taakku qanoq piginnaaneqarnersut tunuliaqutaqarnersullu eqqumiigineqanngitsoorneq ajorput. Naalakkersuisuni isummertaaseq allanngortinneqassappat politikerit allanit taarserneqartariaqassasut ernumassutigaara, taamaattoqanngippat siulersuisunut ilaasortat arlaannaanulluunniit attuumassuteqanngitsut tunngavigalugit qinerneqartarnissaat upperilissanngilara, Birtha Bianco siulersuinut ilaasortanngorusunnerluni sooq aperineqanngisaannarnerminik eqqumiiginnitsoq oqarpoq.

Atuagassiaq naqereersoq - suli arnat pingasut

38-nik ukiulik Julia Pars Air Greenlandimi siulittaasunngorpoq Namminersornerusut inassuteqarnerisigut apriilip 12-anni.

Royal Greenlandip apriilip 27-anni immikkut ittumik ataatsimeersuarnerani siulersuisuni ilaasortat nutaat marluk toqqarenqarput. Aappaa arnaavoq, 32-nik ukiulik Kathrine Bødker, Tele Greenland-imi atorfeqartoq.

Tele Greenlandip maajip 24-anni ataatsimeersuarnerani Margrethe Sørensen Namminersornerusunit siulersuisunut toqqagaavoq.

Arnanut nr. 16-imi atuaruk...