KNR public service pillugu tusarniaaniarpoq
KNR-ip siunissaa nukittorsarniarlugu siulersuisut kissaatigaat politikikkut ukiunut arlalinnut siumut isumaqatigiissuteqartoqassasoq.
KNR-imi siulersuisut Københavnimi ataatsimeeqqammineranni isumasioqatigiinnissaq imaluunniit public service-mik (inuiaqatigiinnik kiffartuussinermik) paasinneriaaseq pillugu immikkut tusarniaasoqassanersoq siulersuisut aalajangerpaat.
Ukiamut tusarniaasoqassaaq tusarniaanermilu politikerit nutaarsiassaqarnermillu suliaqartut peqataanissaat naatsorsuutigineqarpoq.
– KNR-imi siulersuisut tusarniaanermi KNR-ip siunissami qanoq ittuunissaa pillugu oqallinnerup aallartisarneqarnissaa kiisalu kiffartuussinermut Inatsisartuni isumaqatigiissusiortoqarsinnaanersoq taamaalillunilu KNR-p nutaarsiassaqarfittut nukittorsarneqarnissaanut iluaqutaasinnaasumik isumaqatigiissusiortoqarsinnaanera kissaatigaat, siulersuisuni siulittaasoq, Juaaka Lyberth aamma Lars Lennert-Sandgreen allapput.
KNR-imi sulisut tunngavigalugit misissueqqissarisoqassaaq misissueqqissaarinerullu inernera ukiamut piarissaaq.