134-mut sianertut amerliartoqaat

Sianertut 2006-imi marloriaatinngorsimasut Paarisa ilisimatitsivoq. Meeqqat 18-it inorlugit ukiullit amerælanersaapput, 74 procentiullutik.

134-mut sianertartut pingajorarterutaat niviarsiaraapput.

Ukioq kingulleq Meeqqat Inuusuttullu Oqarasuaataannut ”134” –imut kinaassutsimik oqaatiginninngikkaluarluni saaffiginninnerit amerlassusaat PAARISAp naatsorsoqqammerpai. Ukiumoortumik nalunaarusiap, sualummik qinngasaarneqartarnerup nakuuserfigineqartarnerullu kingunerisaanik siunnersortinnissamik pisariaqartitsineq annertuumik qaffariarsimasoq takutippaa.

2006-imi oqaloqatiginninnerit siunnersuinertallit 2005-mut naleqqiullugu 58 procentimik amerleriarput. Saaffiginninnerit tamakkerlugit naatsorsoraanni marloriaatinngungajalluinnarsimapput, tassa 2005-imi 443-niit 2006-imi 964-inut, taakkunannga ”134” sumut atorsinnaanerlugu paasiniaalluni saaffiginninnerupput aammalu ilarpassui sianeraluarlutik ilisiinnarnerit imaluuniit oqarasuaammik asuli pinnguarnerullutik.

Maanna Meeqqat Innusuttullu Oqarasuaataat ”134” ukiuni arfinilinni ingerlareersimalerpoq, tassalu meeqqanit inuusuttunillu inuunermi unamminartut minnerit annertunerillu pillugit inersimasumik ilisimasalimmik oqaloqateqarnissamik pisariaqartitsisunit siusinnerusumut naleqqiullugu atorneqarnerulersimalluni.

Oqaloqatiginninnerit siunnersuinertallit 74 procentii meeqqanik 18 inorlugu ikiulinnik oqaloqatiginninnerupput, taakkunannga affaat sinnerujussuarlugit niviarsiaqqanik oqaloqatiginninnerullutik.

Ajornartorsiutit meeqqat inuusuttullu siunnersorneqarfigisaat tassaapput apeqqutit inuusuttunngulernermut tunngasuniit qinngasaarneqartarnerup, nakuuserfigineqarsimanerup, aanngajaarnartunik atornerluinerup imaluunniit imminornermik misigisaqarsimanerup nassatarissaanik kingunerlutsitsineq.

Qinngasaarneqartarneq nakuusertarnerlu pillugu ajornartorsiutit tassaapput 18 inorlugit ukiullit siunnersortikkumallutik saaffiginnissutigikkajutaat, tassa saaffiginninnerit 30 procentii. Aammattaaq meeqqat arlaqaqisut angerlarsimaffimminni angajoqqaaminnit qimaannarneqarsimanertik saaffiginnissutigisarpaat.

Inersimasut siunnersorneqarsimasut aanngajaarniutinik atornerluineq imminornerlu amerlaqatigiikannersunik saaffiginnissutigaat. Kiserliorneq oqqannerlu meeqqat inersimasullu akornanni arlaqartunit saaffiginnissutigineqarput.

Tamaat isigigaanni nakuusertarneq tassaavoq akulikinnerpaamik siunnersuiffigineqartarsimasoq. Siunnersuilluni oqaloqatiginninnerni ajornartorsiutit allat eqqartorneqakkajuttarput, tassa saaffiginnittut amerlasooriarlutik nuanniitsunik assigiinngitsunik aqqusaagaqartarsimanerat pissutigalugu. Assersuutigalugu nakuuserneq pillugu siunnersortikkumalluni oqaloqatiginninnerit 30 procentiisa missaanni aamma aanngajaarnartunik atornerluineq eqqartorneqartarsimavoq, tamatuma ajornartorsiutit qanoq assigiinngiiaartiginerat takutippaa.

Meeqqat Inuusuttullu Oqarasuaataat ”134” sapaatip akunnera naallugu ullut tamaasa nal. 19-ip aamma 21-llu

Powered by Labrador CMS