Kunngissap siniffia Helenep atorpaa
Helene S. Pedersen Nuummeersoq Qaanaami akunnittarfimmi Kunngissap Frederiup inigisimasaa atorpaa.
– Sinilluaqaanga. Tarninga malugisinnaangajappara, Helene S. Pedersen illarluni oqarpoq.
Helene S. Pedersen suliffimminut atatillugu Qaanaamut angalavoq.
– Imminut oqarfigisimavunga illoqarfimmit aallartinnanga siniffiit marluullugit siniffigiumaarlugit. Taava tamakkiisumik qulakkiissavara kunngissap siniffigisimasaani sinissimallunga, taanna oqarpoq.
Qaanaap akunnittarfiani ini 4-mik normoqarpoq akunnittarfimmilu init atorumaneqarnerpaat ilagalugu. Kunngissaq tassani najugaqarsimavoq Siriusimikk ilisimasassarsiornissarsuarmut piareersarnerminnut atatillugu.
Inimi Kunngissap Frederiup akunnittarfimmik piginnittut Hans aamma Birhe Jensenip paniallu ilagalugit assingat nivingavoq.
Akunnittarfimmik piginnittup Hans Jensenip erseqqissarpaa kunngissaq inuk persuarsiunngitsorujussuusoq.
–Inuppassuit inimi assiliisarsimapput. Angut ilakkuminartuuvoq iluarinartuullunilu inuppalaarluinnartuullunilu. Kunngikkormiutut Ataqqinassusilimmik taagortikkusunngilaq. Oqarfigaatigut ativut atuinnarlugit immitsinnut saaffigisassasugut, akunnittarfimmik piginnittoq oqarpoq.