Meeqqanik titartaasitsinermik INI unammisitsivoq

INI meeqqerivinni atuarfinnilu nuna tamakkerlugu titartaanermik unammisitsiniarpoq, kalaallit Titartaanermik Grand Prix-iannik.

Meeqqeriviit meeqqallu atuarfianni nukarlerni akullernilu atuartut tamarmik peqataasinnaapput. Titartakkani sammineqassaaq "Najugaqarfiit", tamatumanilu titartarneqarsinnaapput pinnguartarfiit, meeqqat inaat, angerlarsimaffik ilaquttallu.

Melodi Grand Prix-ivittut innuttaasut nuannarinerpaasatik taasinnaavaat. Tamanna pissaaq julip 2-anni, taamaasineranii meeqqat titartagaat tamarmik www.ini.gl-imi takuneqarsinnaallutik. Taasineq ingerlanneqassaaq 3. august 2007 tungaanut.

Isiginnaartitsisartoq Rassi Thygesen dommeriuvoq innuttaasullu taasisimasut peqatigalugit meeqqat titartagaat kusanarnerpaat toqqassavai.

Ajugaasumut gavekorteqarpoq 5.000 koruuninik aningaasartalimmik, nr. 2 2.500 koruunissaqarpoq nr. 3-ngortorlu 1.500 koruunissaqarluni. Akissarsiat meeqqanut ataasiakkaanut tunniunneqassanngillat atuarfimmili klassimut tamarmut imaluunniit meeqqerivimmi inimut.

Powered by Labrador CMS