Imigassaq kimittooq mattullugu
Atugarliuuterpassuarnut aallaaviusartoq nioqqutaajunnaartuuppat ajornartorsiutit ilarpassui peerutissagaluartut Qaanaap palasia isumaqarpoq
Qaanaami imigassamik nioqquteqarnermi kisitsisit qimerlooraanni maluginngitsuugassaanngitsumik annertorujussuuvoq.
Pilersuisup kisitsisaatai naapertussagaanni 2006-imi imigassaq katillugu 7.733 liiteri Qaanaami pisiarineqarpoq, aali ukiuniut siuliinut naleqqiullugu appasinnerpaalluni.
14-nik ukioqalereersimasunut agguaqatigiissikkaanni inummut ataatsimut 15,5 liiteriuvoq, kimittuuinnarlu pigaanni 8,7 liiteriulluni.
Nuna tamakkerlugu agguaqatigiissikkaanni inummut ataatsimut imigassaq 11,6 liiteriuvoq.
– Qaanaap sumiiffinnut allanut naleqqiulluni allaanerussutigiuaannarpaa imigassap kimittuup aallunneqarnerujussua, Juaanna Platou oqarpoq.
Juaanna Platoup ukiuni 15-ini Qaanaap Kommuniani ilinniartitsisutut palasitullu sulinermini taavani inuiaqatigiit qanimut ilisarisimavai, imigassamillu atornerluinerup malitsigisai takusarlugit.
Kimittooq matullugu
Imigassap kimittuup atugaanera killileqqullugu pisortanut arlaleriarluni saaffiginnittaraluarnerarpoq, kinguneqanngitsumilli.
– Qisuariartoqarneq ajorpoq, naak ajornarorsiutit kingunerisai taama erseqqitsigigaluartut.
Imigassap kimittuup atugaanerujussua pointeqarallarneraniilli pinngortuussasoq Juaanna Platou isumaqarpoq.
– Putumanartua sakkortunerummat imissallugu “akilersinnaaneruvoq”, taamaakkamilu 1996-ip tungaanut pointeqarallarneranit ileqquliutiinnagaasorinarpoq, Juaanna Platou oqarpoq.
Qaanaap nunaqarfiini imigassaq kimittooq nunaqarfimmiut kissaatigisaat naapertorlugu 1999-imili nioqqutaanngilaq, imaanngilarli nunaqarfinni imigassamik ajornartorsiuteqartoqanngitsoq.
– Qaanaamiit allatsitsillutik imigassamik tikisitsisinnaapput, tikittoortoqaraangallu illoqarfimmisorluinnaq meeqqat eqqugaasarput.
Taamaakkaluartoq imigassamik matusineq Juaanna Platoup iluarinngilaa.
– Imigassaq nioqqutaaginnartariaqarpoq, soorlu sinerissap sinnerai taamaattoq, maanili baajat viinnillu kisimik nioqqutaasuuppata atuipilunneq millissagaluarpoq, eqqugaasartullu taamaalillutik ikinnerulerlutik Juaanna Platou oqarpoq.
Sermitsiami tamaat atuaruk...