Thulemut tunngasoq qallunaat naalakkersuisuisa iliuuseqarfigiumanngilaat

1968-imi Thulemi ajunaarnermut atatillugu Europa Parlamentip isumaliutissiissutaata kingorna qallunaat naalakkersuisuisa qanoq iliuuseqarniarnerannik Sofia Rossen (IA) § 20-mik ministeriunermut apeqqummini akissuteqarfigineqarpoq.

Anders Fogh Rasmussen akivoq: – Naalakkersuisut suliassami annertunerusumik iliuuseqarnissaannut isumaliutissiissut tunngaviliinngilaq.

– Ajunaarnikkut peqqissutsikkut kinguneqaatinut paasissutissanik naalakkersuisut isertuussaqanngillat, imaakkaluartoq ataatsimiititaliap inatsisitigut misissuinerminut atatillugu isumaqatigiissutip EURATOM-imik atornera naalakkersuisut isumaqatiginngikkaat.

– Kræftens Bekæmpelse-p aamma Statens Institut for Folkesundhedip Thulemi sulisuusimasut toqujasarnerannik kræfteqarnerannillu misissuinituaat ilaatigut inerniliivoq: "Thulemi sulisuusimasut saliiffimmi sulisut avataanilu sulisut kræfteqalernissaannut ulorianartorsiornerat assigiinngissuteqanngilaq. Misissuinerit qularnaallipajaarlugu uppernarsarpaat Thulemi sulisuusimasut timmisartup nakkarnera pissutigalugu toqujaarpallaarnerujussuarmik imaluunniit kræfteqalijanerujussuarmik nalaanneqanngitsut, Anders Fogh Rasmussen akissummini allappoq.

Powered by Labrador CMS