Kalaallit Danmarkimi ilinniagaqartut akikillisaatinik pisinnaajunnaarput
Kalaallit Danmarkimi ilinniagaqartut kattuffiata, Avalak, kalaallit ilinniagaqartut angalanermi tapissutinik pisinnaajunnaarnerat iluarinnilluinnarpaa
Parnuna Egede, Avalaap siulittaasua:– Kalaallit Danmarkimi ilinniagaqartut immikkoortinneqaqqipput.
Ilinniagaqartut SU-mik pisartagalittut allatuulli qimuttuitsunut bussinulluunniit ilaanermi akikillisaavigineqarsinnaajunnaarput. Ilinniagaqartunut 26-it sinnerlugit isertitakittunullu wildcard-it Folketingip killiliiffigai, taamaalillunilu akilliisaavigineqassagaanni SU-mut allagartaqarnissaq piumasarineqalerpoq.
– Folketingip taamatut aaqqiinermigut kalaallit Danmarkimi ilinniagaqartut Danmarkimi SU-mik pisarnatik nunatsinniliu ilinniarnermut tapiissutinik pisarnerat puigorsimavaa. Taamaattumillu uagut isertitakittuugaluarluta SUU-millu pisinnaasuugaluarluta akikillisaatinik pisinnaajunnaarpugut, Parnuna Egede oqarpoq.
Kalaallit ilinniagaqartut siornatigut angalanermut Kalaallit Nunaanni Namminersornerullutik Oqartussaniit tapiiffigineqartarsimagaluarput, siornali iluarsaaqqittoqarnerani tapiissutit peerneqarsimapput.
– Tapiissutit peerneqarnerisigut pingaartumik kalaallit Københavnimi ilinniagaqartut, illussaaleqineq pissutigalugu ilinniarfigisaminnut ungasissuni najugaqartut eqqugaapput. Akerlianilli ilinniaqataat qallunaat savalimmiormiullu angalanermut tapiissutinik pisinnaajuaannarput, naak tamarmik naalaagaaffeqatigiiffimmi Danmarkimi innuttaagaluarlutik.
– Nunani allamiut Danmarkimi innuttaasunut akulerutivinnissaat sukataarunneqartartorujussuuvoq, namminnerli naalagaaffeqatitik Kalaallit Nunaanneersut puigortarpaat. Kalaallit ilinniagaqartut taamatut assigiinngisinneqartariaqanngikkaluarput, Avalaap siulittaasua oqarpoq.
Maannakkorpiaq kalaallit 402-it Danmarkimi ilinniagaqarput, taakkunanngalu 202-it 26-nik taakkuluunniit sinnerlugit ukioqarput.
– Taamaattumillu taakku akikillisaasiisarnermut ilanngunneqaraluartaluunniit akissaarunnaavianngikkaluarput.
Avalaap kalaallit Folketingimi politikerit kajumissaarpai akikillisaasiisarnermik aaqqissuussineq isumaliutigeqqeqqullugu, ajornartorsiutit ataatsimoortumik iluarsiivigissaat anguniarlugu.