Ataatsimeereermata Japanimiut pakatsipput
Arfanniarnermut ataatsimiititaliarsuarmut, IWC, assingusumik kattuffiliornissaq Japaniumiut eqqarsaatersuutigaat, ataatsimiititaliarsuup Alaskami ukioq´manna ataatsimiinnerani ilaasortat suli avissaartuuteqqaqqaat.
Alaskami Anchoragemi Arfanniarnermut ataatsimiititaliarsuup ataatsimiinnerata naammassiartuuaarnerani Japanimiut inuussiarnersumik qungujulajunaavipput.
Japanimiut arfernik illersuisunit marloriarlutik itigartinneqartarput. Ilaatigut uumasut nungutaanissaminnik navianartorsiortinneqartut pillugit Washingtonimi isumaqatigiissummut (CITES) tunngatillugu ataatsimiittut isumaqatigiissummik aalajangersaapput. Aalangersakkami arfanniaqqusinnginneq suli atuuttoq erseqqissaatigineqarpoq. 37-t isumaqataallutik taasipput, sisamat akerliupput sisamallu taaseqataanngillat, taakkua ilagaat Danmarkimeersut Nunatsinneersullu. Taasinermi nunanit 26-neersut taaseqataanngillat, aamma Japanimiut.
Tamatuma saniatigut sinerissami inuiaqatigiinnguit sisamaasut killilimmik arfanniartarsinnaatitaanissaannut Japanimiut amerlanerussuteqartunit tapersersorneqanngitsoorput. Siunnersuut ukiuni kingullerni Japanimiut arlaleriarlutik IWC-mi saqqummiuttarsimasaat.
Pakatsinerujussuaq
Japanimiut pakatsigaaramik Arfanniarnermut ataatsimiititaliarsuarmit ilaasortaajunnaarnialutik siorasaaripput.
– Naammagittaannarsinnaajunnaalerpugut. Ilaasortaaginnassanerluta isumaliutersuutigisariaqarparput imaassinnaavorlu qanoq ililluta allamik kattuffiliorsinnaanerput eqqartorlugu aallartissaagut, oqallinnerup nalaani Japanimiut allartitaat oqarput.
Japanimiut pakatsinertik erseqqissarniarlugu 2009-imi ataatsimiinnissamut aaqqissuisuunissamik neqeroorutertik tunuartippaat.
Taarsiullugu Portugalimi Madeirami ataatsimiittoqassaaq. Aappagu, IWC-ip ukiunik 60-inngortorsiorneranik malunnartitsisumik, Chilemi Santiagomi ataatsimiittoqassaaq.
Timitaliinertaqanngitsumik siorasaarineq
Japanimiut IWC-mit ilaasortaajunnaarniarlutik aatsaat siorasaarilinngillat.
Timitaliinertaqanngitsumiguna siorasaarisut, Japanimiummi kattuffimmi ilaasortaaginnarunik tamanna iluaqutigissavaat. Taamatut Jun Hoshikawa, Greenpeacep Japanimi immikkoortortaqarfiani siuttuusoq isumaqarpoq.
– Japanimiut ilaasortaajunnaarsinnaanngillat, taamaalioraluarunimmi nunani tamalaani kattuffinni pitsaasumik isineqaatertik annaassavaat, Jun Hoshikawa, Anchoragemi ataatsimiinnerup kingorna Sermitsiaq.gl-imut oqarpoq. Taassuma IWC-mi assigiiaaginnarmik ingerlasoqarunnaassappat Japanimiut ilisimatusaatigalugu arfanniartarunnaartariaqarsorai.