Innuttaasut siunnersuisoqatigiivi

Inatsisartut inatsisaat nr. 13 20. oktober 1988-meersoq tunngavigalugu innuttaasut siunnersuisoqatigiivinik pilersitsisoqarpoq.

Maannakkut siulittaasuungallartoq Jørgen-Ole Nyboe Nielsen.

Namminersornerullutik Oqartussat innuttaasullu akornanni attaveqatigiinnerulernissamik kissaateqarneq tunngavigalugu Pituffinni Innuttaasut Siunnersuisoqatigiiffiannik pilersitsisoqarpoq. Pituffik kommunit avataanniimmat kommunalbestyrelseqaranilu nunaqarfittut aqutsisoqanngilaq, Kalaallit Nunaata sinnerisani suulli innuttaasunik sullissiviusinnaasunik.

Kikkulluunniit ullormi qinersiviusumi ukiup affaani Pituffimmeereersimasut, ammalu Danmarkimi nunanilu avannarlerni innuttaassuseqartut Inuttaasut Siunnersuisoqatigiiffiannut qinersisinnaallutillu qinigaasinnaapput. Nunanili avannarlerni allani innuttaasut ullormi qinersiviusumi sivikinnerpaamik ukiuni pingasuni qallunaat kunngeqarfianni najugaqarersimasariaqarput. Taamaattumik Innuttaasut Siunnersuisoqatigiiffiannut qinigaasinnaalluniluunniit qinersisinnaassagaani inuit aqqisa allattorsimaffiannut nalunaarsimanissaq piumasaqaataanngilaq.

Innuttaasut Siunnersuisoqatigiiffiannut qinigaasimasut ukiuni sisamani atasussaasarput. Kalaallit Nunaanni kommunalbestyrelsinut nunaqarfiillu aqutsisuinut qinersisoqartillugu qinersisoqartarpoq. Ilassutissanilli qinersisoqarnissaa pisariaqalersinnaasarpoq.

Innuttaasut Siunnersuisoqatigiivisa sumiiffimmi innuttaasut soqutigisaat isumagisussaammatigit Innuttaasut Siunnersuisoqatigiivi assigiinngitsorpassuarnik suliaqartarput. Innuttaasut Siunnersuisoqatigiivisa innuttaasut pisinnaatitaaffii Namminersornerullutik Oqartussat pisortaqarfiinut attuumassuteqartut, soorlu akileraarnermut, isumaginninnermut kultureqarnermullu tunngasut isumagisussaasarpaat. Innuttaasut Siunnersuisoqatigiivi Namminersornerullutik Oqartussat pisortaqarfiisa sumiiffimmilu najugallit akornanni attaveqaataapput/oqaaseqartartuupput, taamatullu aamma suliffeqarfiit pisortallu, sumiiffimmiittut sumiiffimmilu najugallit innuttaasut atugaasa pitsaasuunissaannik suliaqartut akornanni attaveqaataallutik.

Innuttaasut Siunnersuisoqatigiiffiata Pituffimmi kulturimut sunngiffimmilu sammisaqarnermut akisussaaffik 2007-mi tiguaat tamakkunatigullu atortorissaaruteqarnissaq isumagilerlugu, tassalu kulturikkut katerisimaartarfik/isersimaartarfik kiisalu init oqaatsinik EDB-lerinermillu ilinniartitsiviusinnaasut pitsaasut.

Innuttasut Siunnersuisoqatigiiffiata ukiuni arlalinni Qaanaap kommunia suleqatigisimavaa. Qaanaamiit Pituffimmi suliffeqalersartut/sungiusarlutik sulisartut amerlanerulernissaat anguniarlugu, Innuttaasullu Siunnersuisoqatigiiffiata maannakkorpiaq aamma Qaanaap kommunia suleqatigalugu Qaanaap Pituffiullu akornanni angalaniarnermi pissutsit pitsanngorsaavigai.

Ullumikkut makku innuttaasut siunnersuisoqatigiiffianni ilaasortaapput Jørgen-Ole Nyboe Nielsen (Dino-mik taaneqarajunnerusoq), Jørgen Wegeberg aamma Carsten I. Hansen.

Siornatigut ilaasortaasimasut marluk Pituffimmiit aallarnikuullutillu Carsten I. Hansen Innuttaasut Siunnersuisoqatigiiffianniit tunuarusummat julip 31-ianni ilassutissanik qinersisoqassaaq.

2005-imi Pituffimmi Innuttaasut Siunnersuisoqatigiiffiannut qinersinermi makku qinigaapput: Jørgen Wegeberg, Randi Egede, Birgit Vilslev, Carsten I. Hansen aamma Jørgen-Ole Nyboe Nielsen (Dino).

Randi Egedekkut Birthe Vilslevilu sakkutooqarfimmiit aallarnikuummata julip 31-ianni Pituffimmi ilassutissanik qinersisoqassaaq.

Powered by Labrador CMS