Allami nuanneqaaq angerlarsimaffilli nuannernersaavoq
Marianne Hammelboe ukiuni pingasuni Thule Air Basemi sulereersimalluni augustimi Danmarkimut utissaaq
– Thule Air Base sumiiffik pissanganartuuvoq, inuiaqatigiilli aamma ikittuinnaapput. Danmarkimi illoqarfeeqqamut sanilliunneqarsinnaavoq. Inuiaqatigiinnguani iluaqutissartaqarpoq, aammattaarli soorunami ajoqutissartaqarluni. Kikkut tamarmik imminnut ilisarisimapput, Marianne Hammelboe oqarpoq.
Taanna Pituffimmi Greenland Contractorsimi supervisoritut sulivoq.
Ukiuni pingasuni sakkutooqarfimmiissimavoq, maannali angerlalerluni nutaanik unammilligassarsiorluni.
– Maani immitsinnut qanittuararsuulluta inuuvugut, arlaatigullu misigisimanalaarpoq inuiaqatigiit nalinginnaasut avataaniilluni. Piffissaq maani allarluinnarmik misigisimanartarpoq. Ataatsikkut sukkasuumik sukkaatsumillu ingerlasarpoq.
– Danmarkimi sorlaqarpunga.
– Allamiilluni nuannertaqaaq, angerlarsimaffilli nuannernersaavoq, Marianne Hammelboe oqarpoq.
Taanna uiata Kalaallit Nunaannut pilerinnilersissimavaa.
– Uiga siulliulluni atorfinippoq, ukiullu aappaata missaa qaangiuttoq malinnaavunga.
– Uiga ukiuni qulini ilisarisimasimavara ukiunilu pingasuni katinnikuuvugut.
– Uiga sakkutooqarfimmiiginnarniarpoq, uanga Danmarkimut nuullunga. Qujanartumik Greenland Contractorsimi sulisut ukiumut sapaatip akunnerini qulit missaanni feriartarput, teknologilu nutaaq atorlugu ungasissumit aappariinnerput ingerlassaqqaarpoq.
– Aamma iluaqutaavoq tamassuma nammineq isinik takusimanera. Nalunngilara uiga sumi qanorlu isilluni najugaqartoq. Angerlaruni tamaani inuunerminik oqaluttuai paasilluarsinnaanerussavakka, siulliulluni maanngarluni oqaluttuaaninngarnit.
– Marluulluta Danmarkimi inersimasunik qitornaqarpugut, tamatumalu saniatigut Danmarkimi nutaamik suliffittaarsimavunga.
Amerikarmiut tunngavigisaat
– Inuiaqatigiinni kalaallit qallunaallu arlaliugaluarluta amerikarmiut sakkutooqarfigaat sakkutuut malittarisassaannik atorneqartussanik malittarisassalik, taamaattumik Thule Kalaallit Nunaajunngilaq.
– Inuiaqatigiit assigiinngitsuuvugut, inuiaat assigiinngitsut pingasuulluta.
– Inuit Pituffimmut tikittartut amerlanerpaartaat tassaapput inuit inuunermi atugassarisanik allaannerusunik unammilligassartaanillu misigisaqarusuttut. Aallarusunneq misigisassarsiorusunnerlu soorunalumi aamma pitsaanerusumik isertitaqarusunneq, aningaasalli kisimik apeqqutaanngillat.
– Amerlanerpaartaat ukiuni 3-5-ini maani sakkutooqarfimmiittarput, tassanilu atorfissarsiornissaq inassutigineqarsinnaalluarpoq, tassa angerlarnermi inuttut suliatigullu pitsaasunik misigisarpassuit nassarneqassammata, Marianne Hammelboe oqarpoq.