Nunatsinni timigissartarfiit annersaat
Thule Air Basemi Fitness og sportscentererimi hockey, nalunneq, basketball allarpassuillu sammineqarsinnaapput
– Sakkutooqarfimmi maani timigissarneq pingaartittorujussuuvarput, Greenland Contractorsip fysioterapeutia Mie Thomsen oqarpoq.
Thule Air Basemi najugallit biilinik angalasarput imaluunniit akeqanngitsumik taxartarlutik.
– Sakkutooqarfimmi maani pisuppiartoqarneq ajorpoq. Inuit pisuppiarneq ajorput sikkilerpiarnerlu ajorlutik. Biilernissaq ajornannginneruvoq.
– Taamaattumik timigissartarnissaq pingaaruteqarpoq.
Mie Thomsen centerimi kisimiilluni fysioterapeutitut sulivoq. Timigissarnermik immikkut ilisimasallit pingasut peqatigalugit isumagisarpaa sakkutooqarfimmi najugallit eqqortumik sungisartarnissaat timigissartarnissaallu.
– Assigiinngitsunik misilitsitsisarpunga. Inuit katsorsartarpakka, aerobicimi ilinniartitsisarlunga, kivitseriaatsimi ilinniartitsisarlunga taavalu avatangiisit pillugit sammisaqartitsisarlunga.
Tamatuma saniatigut Mie Thomsen sungiusarnermik ilinniartitsisarpoq.
– Sapaatip akunneranut pingasoriarlunga Air Forcemi sulisut sungiusartittarpakka. Sulisut atorfinitsitaanermut isumaqatigiissutaanni allassimavoq sapaatip akunneranut pingasoriarlutik sungiusartassasut.
– Pingaaruteqarpoq timip aalatittarnissaa, pingaartumik maani Thule Air Basemi.
Timersornerpassuit
Avataanit isigalugu fitness og sportscenteri qasertoq angisooq nuanniippasippoq. Iseraannili nuannersumik tupaallannartoqarpoq.
Sakkutooqarfimmi najugallit 500-t ilaatigut sammisarsinnaavaat hockey, basketball, softball, badminton, arsaanneq, volleyball, tennis aamma yoga.
Tamatuma saniatigut nukkassartoqarsinnaavoq, palersaavimmi palersartoqarsinnaalluni, majuarfiliakkut majuartoqarsinnaalluni imaluunniit tilluunnermik sungiusartoqarsinnaalluni.
Tamatuma saniatigut neqeroorutigineqarput spinning, pump, step aamma body-workout.
Init quleriit siullianni inimi angisuumi ipunnermut maskiinaqarpoq, timigissaatinik sikkileqarluni, crosstrainerseqarluni, arpattarfeqarluni, kivittakkanik nukkassaateqarluni ilaallu ilanngullugit.
Centerip naluttarfia allaaneruvoq takuminarlunilu.
Naluttarfik sarfamut assorluni nalunnermut imaaniinnermullu sungiusaataavoq. Tassani naluttoqarlunilu naluttarfeeqqami sungiusartoqarsinnaavoq.