Pisuinnarluni Canadaliarniartoq

Qimaasoq Bangladeshimeersoq Qaanaap eqqaanut uniinnarsimavoq sikukkut pisuinnarluni Canadaliarialuarluni. Angut Air Greenlandip helikopterianik aaneqarpoq maannalu Danmarkimi nunanut allamiunut oqartussaasunut tunniunneqassalluni, taamatut oqaluttuarpoq KNR-p Radioavisia.

Hamidur Rahmann isummamigut malersugaalluni qimaasuuvoq 2004-miillu Tysklandimi najugaqarsimalluni, tassanili nammineq, nuliilu ernertillu pingasunik ukiulik qimaasutut nunasinissaminnut itigartinneqarsimallutik. Tamatuma kingorna ilaqutai Malaysialiarput, Hamidurili Canadaliarusussimavoq.

Island Savalimmiullu aqqusaarlugit Kalaallit Nunaannut timmisartorpoq, martsillu 28-ianni Kulusumut tikilluni, tassanngaannillu Nuummut, Sisimiunut, Ilulissanut, Upernvimmut Qaanaamullu ingerlaqqilluni.

Qaanaami piniartumut qimussimik ilaalluni kimmut - sikukkut - 15 kilometerinik avasitsigisumukaatsippoq. Tassanngaanniit pisuinnaq ingerlaqqippoq sikukkut nakkarnissami tungaanaut.Taamaariarmat utimut aallarpoq aqqutaanilu helikopterimik nassaarineqarluni Pituffiliaanneqarlunilu.