Tammaarsimaarnissarsuarmi spejderit peqataassapput

Ukioq manna ukiut 100-t qaangiupput nunarsuarmi spejdereqarnerup lord Baden Powellimit tunngavilerneqarneranit.

Kalaallit Nunaanni Spejderit tamatumunnga atatillugu ukiuni untritilinni atuuttuni spejderit annerpaamik tammaarsimaarnissarsuannut spejderillu misigisaqarnissarsuannut peqataasussanut aningaasanik katersiniarsimapput.

Taamaasilluni spejderit inuusuttut nunatsinneersut 18-it 14-iniit 17-inut ukiullit pisortallu pingasut peqataassapput. Spejderit 2007-imi Worldjamb-imut, nunarsuarmit tamarmit spejderit 40.000-t peqataaffigisaannut, katillugit 21-it aallartissavaat.

Spejderit oqaluttuarisaaneranni jamboree-mi aatsaat taamak angitigisumi kalaallit spejderit aatsaat taamak amerlatigisut peqataassapput.

Inuusuttut 14-iniit 17-inut ukiullit Upernavimmeersuupput, Nuummeersuullutik, Nanortalimmeersuullutik Narsameersuullutillu.

2006-imi februarimiilli Kalaallit Nunaanni Spejderit aningaasanik pissarsiulersimapput, peqataasunullu akiliutissat, angalanermi najugaqarnermilu aningaasartuutissat tamangajaasa katersorsimavaat, tipsimit aningaasanit kiisalu Danmarkimi Sct. Georgs Gilder-init aammalu Nuummi Sct. Georgsgildetimit kiisalu Kalaallit Nunaanni Danmarkimilu aningaasaateqarfifnnit, taamatut paasissutissiivoq spejderit siunnersortaat Piitannguaq Tittusen.

Jamboree ingerlanneqassaaq Tuluit Nunaanni Brownseami julip 27-ianniit augustip 8-annut, tassa ukiut 100-t matuma siorna jamboree-p siulliup ingerlanneqarfiani.

Spejderit 18-it pisortallu ingasut Kalaallit Nunaannit aallassapput julip 20-iata missaani Københavnimiillu Tuluit Nunaanni Heathrowimut ingerlaqqissallutik. Tikinnermik kinguninngua peqataasut tamarmik Edinbourghimi takornariartinneqassapput tamatumalu kingorna spejderit Skotlandimi ilaqutariinni ulluni sisamani najugaqassapput, pisortat worldjamboree-rnermi tammaarsimaffimmik nappaaqataasussat.