Sarfaq Ittuk uterpoq

Ilaasartaat qaammatip aappaata affaa amutsivimmeereerluni ullaaq Nuummut tikippoq.

Sarfaq Ittuk iluarsaanneqareerluni Nuummut tikippoq angalaqqilissallunilu.

Arctic Umiaq Linep ilaasartaataa Sarfaq Ittuk ullaaq Nuummut tikippoq qaammatit aappaata affaani amutsivimmeereerluni.

Sinersortaat martsip qiteqqunnerani Danmarkimiit Kalaallit Nunaaliarnermini malerujussuarmik qaarfigitilluni ajoquserpoq aquttarfiani igalaat pingasut aserorlutik. Umiarsuaq annertuumik ajoquserpoq, teknikkikkut atortuisa ilarpassui taarsertariaqarlutik.

Sarfaq Ittuk pisortatigoortumik sinersulissaaq sisamanngornermi majip 3-anni, Narsamiit ilaasunik avannamukaassissalluni.

Umiarsuaq Nuummi kujammut aallassaaq majip 1-anni, ilaasoqassanersoq suli aalajangerneqarani. Arctic Umiaq Linemi supporterip Inger Jensenip oqaatigaa umiarsuaatileqatigiiffik ataasinngorpat aalajangissasoq kujammut angalanermini ilaasoqassanersoq.

Arctic Umiaq Line, ukiortaamiit Royal Arctic Linemit Air Greenlandimillu pigineqalersimasoq, teleniata normoraa 34 91 00.

Powered by Labrador CMS