Nuuk TV ullut tamakkiallugit aallakaatitsisalissaaq
Marlunngorneq 1.maj Nuuk TV ullut tamakkiallugit nutaarsiassanik aallakaatitsisalissaaq, kalaallisut qallunaatullu
– Nutaarsiassat nalunaaqutaq 18:45 aamma 19:15 aallakaatinneqartassapput unnuullu ingerlanerani akunnerit tamaasa Nuuk TV-p kanaaliatigut aallakaateqqinneqartassallutik, pisortaq Jens Olsen oqarpoq.
Allannguinissamik pilersaarusiorneq qaammatit arlallit ingerlanneqarpoq allannguinissamullu atatillugu nutaarluinnarmik aallakaatitsiviliortoqarluni.
Ilanngutassiat aalajangersimasut kiisalu Nuummi silassaq, DMI-p immikkut ittumik Nuuk TV-mut suliarisimasaa, ullut tamaasa aallakaatinneqartalissapput.
Ullut tamakkiallugit aallakaatitsisarnerit pissusissamisut maannamut sanilliullugit naannerulaalissapput, teknikkikkut tusagassiortoqarnikkullu sulisut taakkuuginnassammata. Nutaarsiassalli pisunut malinnaanerulissapput.
Nutaarsiassat Nuuk TV-p nittartagaani 1845.gl-imi Nuuktv.gl-imilu takuneqarsinnaasassapput.