Qasigiannguit efterskolertaassaaq
Efterskolinnanniunnermi Qasigiannguit ajugaavoq
Taamatut paasissutissiivoq borgmester Jess Svane. Ullup qeqqata siuninngua tamatuminnga nalunaarfigineqarsimavoq ilinniagaqarnermut naalakkersuisumit Tommy Marømit.
– Nuannaangaarama qiangajappungaluunniit. Tamarmik nuannaaqaat. Qummoroortartitseqqammerpugut illoqarfimmilu amerlaqisut efalasoq amuvaat, borgmesteri nuannaartoq killitsisimaartorlu oqarpoq.
– Efterskole illoqarfimmut pingaaruteqartorujussuuvoq. Ukiuni kingullerni 20-ini innuttaasut illoqarfimmit nussorput. Efterskoleqaleruttali neriunarpoq arlallit illoqarfimmut uterumaartoq, Jess Svane oqarpoq.
Efterskolinnanniuteqataasimapput Qaqortup, Nanortallip, Tasiilap Sisimiullu kommuunii.
Qasigiannguit blokkit inissit angisuut marluk katillugit 4.620 kvadratmeterinik angissusillit efterskolinngortinniarpai.
Atuarfik atuartitsivimmik inersuaqassaaq inunnut 100-nut inissalimmik. Tamatuma saniatigut pilersaarutigineqarpoq ininik atuartitsiviusunik arfineq-pingasunik pilersitsisoqassasoq, IT-rum, fysikertarfik formningertarfillu ilanngullugit.
Qasigiannguit kommuneata efterskollinngortussamut Villads Villadsen, nunatsinni atuakkiortorsuit eqqumiitsuliortorsuillu ilaat, atsiukkallarsimvaa.