Feriarlutik tikeraat nunarsuup kiatsikkiartornera misigissavaat
Thailand puiguinnarsiuk. Maanna amerikarmiaut Kalaallit Nunaannukartalissapput nunarsuup kiatsikkiartornera namminneq isiminnik takuniarlugu.
Amerkarmiut angalatitseqatigiiffiat piareersimavoq 28.100 koruuninut neqeroorutitsilammik, qeqertap, sermip aakkiartornera pissutigalugu saqqummersimasup, takuniarnissaanut, qallunaat nettimi aviisii arlallit allapput.
Amerikarmiut angalatitseqatigiiffiata maannakkorpiaq septemberimi ulluni 12-ini Kalaallit Nunaanni angalanissat 28.100 koruunillit tuniniarpai. Angalaffigineqassaaq Warming Island, qeqertaq siusinnerusukkut isumaqarfigineqarsimagaluartoq Kalaallit Nunaannut atasoq, qanittukkullu paasineqartoq nammineq qeqertaasoq. Sermeq aammat saqqummersimavoq.
Tamannalu peqatigalugu kitaamiunut misigisaqarusuttunut nutaatut angalaffissanngorsimavoq.
– Qeqertaq paasinarsaataalluinnarpoq nunarsuup kiatsikkiartornerata sukkasuumik sunniutaanut... Angalanermi tamatumani siulliit ilagissavaatsit qeqertamik alutornartumik taassuminnga takunnittut, Islandimiit Tunumut angalaffik pitsaalluinnartoq atorlugu, Betchart Expedition allappoq.
Nunarsuullu kiatsikkiartorneranik takunnikkusuttoqarpoq. Angalanermi inissat 48-t pingajorarterutaat tunineqareersimapput.
Angalatitseqatigiiffiit allat aamma qalasersuarni aakkiartortuni periarfissat takusimavaat. Tuluit angalatitseqatigiiffiat First Choice manna tikillugu taamaallaat Mallorcamut angalatitsisarsimavoq, maannali selskabi sikuiuitsumi avannarlermi puttaanik aakkiartortunik takuniaalluni angalanernik tuniniaasalersimavoq.