Thulemi sulisuusimasut EU-mit taperserneqarput
Naatsorsuutigineqarpoq aqagu, amerikarmiut timmisartorsuata B52-ip qaartartorsuarnik atomitortunik usilluni 1968-imi januarimi Thule Air Baseip eqqaani nakkarnerata kingorna ukiut 40-t qaangiuttullu, EU-Parlamentip isumaliutissiissut akuersissutigissagaa, tassuuna Danmarki isornartorsiorneqarluni sulisartunik, saliinerminni napparsimalersimallutik oqartunik, sumiginnaasimasutut. Taamatut allappoq aviisi ullormut saqqummersartoq Information.
Thulemi sulisuusimasunik suilassaq Jens Peter Bonde-mit, Junibevægelsenimeersumit, saqqummiunneqarpoq.
- Ukiuni 28-ini siullermeersumik EU-mut atatillugu qallunaat naalakkersuisui akerlilerpakka, pisimasorli tamanna Danmarkimut annikilliornartuuvoq, Jens Peter Bonde aviisimut oqarpoq.
Bondep innersuussutigaa isumaqatigiissut Euratrom-traktatimik taaneqartartoq malillugu saliisut atomimik qinngorfigitissimanerannik ukiumoortumik peqqissutsikkut misissorneqartarnissaat qallunaat oqartussaasuisa itigartissimammassuk.
Jens Peter Bonde aamma isumaqarpoq saliinermik sulisut peqqissusaannik paasissutissat oqartussaasut aamma tunniunnaveersaarsimagaat. Pisup taamatut oqaatigineqarnera EU-mi ataatsimiititaliami akisussaasut akuersaarpaat, tamannalu parlamentimi ilaasortap Margrethe Aukenip tupigusuutigaa, taanna isumaqarluni isornartorsiugassaqanngitsoq.
- Pisimasoq misissoqqissaarneqarsimavoq sulisullu qinngornernik pissuteqartumik napparsimalersimanerannut oqarnermut tapersersuisumik saqqummertoqarsimanngilaq, taanna oqarpoq.
Margrethe Auken oqarpoq Thulemi sulisuusimasunut atatillugu sumiginnaanermik unnerluussinerit qallunaat naalakkersuisuisa imaasiallaannaq tunuartissinnaasimagaluarat, Euratom-traktatimilli eqqorneqannginnissaq samminerusimagunarlugu - taammalu Kalaallit Nunaanni qaartartorsuaqarnerata kingunerisaanik EU akulerutsillugu.
- Soorunami eqqarsaatiginngitsoorsinnaanngilara Kalaallit Nunaanni arlaata piumanngikkaa EU-p akulerunnissaa, Margrethe Auken oqarpoq.