Uummannaq aningaasarsiornikkut ajornartorsiorpoq
2006-imut naatsorsuutit ilimagisamit 7,7 millioner koruuninik ajornerupput
"Naammaginanngilluinnarput". Uummannami kommunalbestyrelsip kommunip 2006-imut naatsorsuutai taamatut nalilerpai.
Naatsorsuutigineqarsimagaluarpoq 5 millioner koruuninik sinneqartooruteqartoqassasoq, 2,7 millioner koruuninilli amigartooruteqartoqarpoq - nikingassutit 7,7 millioner koruuniullutik. 2006-imut naatsorsuutit pitsaanngitsut pingasunik pissuteqarput:
- Isumaginninnermut ataatsimiititaliap aammalu Meeqqanut Kulturimullu ataatsimiititaliap missingersuutinit 5 millioner koruuninik amerlanerusunik atuisimapput.
- Akileraarutitigut isertitat naatsorsuutigisamit 2 millioner koruuninik ikinnerupput.
- Akiligassanut annertunerusumik nalikilliliinerit 1 million koruuninik isertitakitsitsinerupput.
- Uummannap kommuniata piffissami matumani 2007-imut missingersuutit misissoqqissaarpai siorna amigartoorutit matussutissaqartinniarlugit, borgmester Jens Lars Fleischer kommunaldirektørilu Pollas Lyberth paasissutissiipput.