Atassut: Qaanaami meeqqat sumiginnagaanerat qanoq annertutiginersoq Naalakkersuisut misissuisitsissappat?
– Qaanaami meeqqat sumiginnagaapput, angajoqqaavilu soqutigisaqaratik aalakoorput, Karen Littauer oqarpoq. Tamanna ilumoorpa, Atassutip inatsisartuini ilaasortaq aperipput.
Karebn Littauer DR-imut ilaatigut ima oqarpoq: – Takusakka amiilaarnaqaat. Angajoqqaat ernguttut meeqqallu angerlarusunnatik aniiginnartut.
– Qaanaami inersimasut imigassamik sakkortuumik atornerluisuunerarlugit tamatumalu kingunerisaanik meeqqat sakkortuumik sumiginnagaanerarlugit allaallu perlilerlutik unnuarsuarmut aneertarnerarlugit piffissami matumani nutaarsiassat aqqutigalugit nutaamik siammarterisoqalerpoq, Atassutip inatsisartuni ilaasortai allapput.
– Meeqqat illersugaanissaat pisinnaatitaaffiilu tunngavigalugit nunatsinni pisortat sullissisussaatitaanerat innersuussutigalugu immikkut iliuuseqartoqartariaqarnersoq paaserusullutigu, matumuuna ATASSUT sinnerlugu Inatsisartuni ilaasortaatitaasugut Naalakkersuisunut apeqqutigaarput Qaanaami inersimasut imigassamik atornerluisuunerisa kingunerisaanik meeqqat sumiginnagaanerat qanoq annertutiginersoq paasiniarlugu misissuisitsiniarnersut, Atassutikkormiut aperipput.
– Paaserusupparput Naalakkersuisut iliuuseqarnissamik pilersaaruteqarsimassappata qanoq pilertortigisumik tamanna ingerlanniarneqarnersoq kiisalu paasinarsippat ilumut immikkut iliuuseqartoqartariaqartoq, immikkut iliuusissat suut ingerlanneqassanersut Naalakkersuisut maannangaaq isummersorfigereersimaneraat paaserusunnarpoq.