Qaanaami imigassamik tuniniaaneq matuneqarpoq
Naalakkersuisut ullumi aalajangerput Qaanaap kommuneani imigassanik 2,25 procentimit kimittunerusut nioqqutigineqarnerat sassaalliutigineqarnerallu sivisussusissaa aalajangernagu matuneqarallassasut.
Qanittukkut Karen Littauer Qaanaami pissutsit uparuarpai innuttaasut imerajuttuunerarlugit.
Qaanaap kommuneani isumaginninnikkut annertuumik ajornartorsiuteqarneq pissutaalluni imigassanik aalakoornartulinnik nioqquteqarneq matugallarneqarpoq. Naalakkersuisut isumaginninnikkut ajornartorsiuteqarnermut iliuuseqarniarput.
Qaanaap kommuneani imigassamik ajornartorsiuteqarnerup annikillisarnissaa siunertaralugu ataatsimut ataqatigiissaakkamillu kommune Peqqissutsimut Naalakkersuisoqarfik suleqatigalugu iliuusissatut pilersaarusiaqarpoq. Pilersaarut Ilulissani Qaqiffillu suleqatigiinnissamik isumaqatigiissuteqarnermik ilaatigut kinguneqarpoq. Kommunemit kissaatigineqarsimavoq ukioq 2007 immikkut iliuuseqarfiussasoq, tamannalu imigassanik aalakoornartulinnik nioqquteqarunnaarsitsinikkut Naalakkersuisunit akuerineqarpoq.
Naalakkersuisut neriuutigaat Qaanaami ilaqutariit atugaasa malunnaatilimmik pitsanngortinnissaat. Pisortaqarfiit attuumassuteqartut, Qaanaap kommunea Qaanaamilu innuttaasut peqataaffigisaanik maanna ataatsimiititaliortoqassaaq, Qaanaap kommuneani inuuniarnikkut atugassarititaasut qanoq pitsanngorsarneqarsinnaanerannik qulaajaasussamik.
Qaanaap kommuneani inuuniarnikkut atugassarititat piffissaq ungasinnerusoq eqqarsaatigalugu qanoq pitsanngortinneqarsinnaanerannik iliuusissatut pilersaarusiornissaq ataatsimiititaliap siullermik suliarissavaa. Suliffissaqarniarneq, innuttaasut atugarissaarnikkut ajornartorsiutaat aamma isumaginninnikkut ajornartorsiutaat, taamalu meeqqat sumiginnarneqarnerat tamakkiisumik isiginiarneqartussaammata iliuusissatut pilersaarutissaq annertussaaq.
Qaanaap kommuneanut tunngatillugu aalajangiineq immikkooruteqanngilaq, Ittoqqortoormiit kommuneani imigassamik aalakoornartulinnik aamma matoqqatitsisoqarnikuummat. Taamaaliorneq innuttaasut atugarisaannik nalinginnaasumik malunnaatilimmik pitsanngoriartitsivoq. Naalakkersuisullu neriuutigaat Qaanaap kommuneanittaaq taamatut pisoqarumaartoq.