Innarluutillit saqqummersitsissapput
Saqqummersitsinissaq "Siunissamut sinnattukka", meeqqat inuusuttullu innarluutillit suliaannik saqqummersitsiviusussaq, soqutigineqarluarpoq.
Tamanna suliat sinerissamiit Ilaqutariinnermut Pisortaqarfimmut nassiussuunneqarsimasut takutippaat. Klassit immikkut atuartitsiviusut, suliffeqarfiit, peqatigiiffiit inuillu ataasiakkaat saqqummersitassaminnik nassiussuilluarsimapput.
Saqqummersitsinissaq aaqqissuunneqarpoq innarluutillit pillugit Nuummi ulluni 14.- 16.maj 2007-imi ataatsimeersuartitsinissamut atatillugu ammarneqassaarlu naalakkersuisunut ilaasortamit Aleqa Hammondimit sapaammi 13. maj 2007, nal. 14.00, Katuami pissalluni.
Innarluutillit amerlasuut, meeqqat inersimasullu, innarluutertik pissutigerpiarlugu siunissamut isumalluarnertik takorluukkatigut sinnattumikkullu oqaasinngorlugu annikkuminaatsittarpaat.
– Peqataarusussutsilli ersersinneqartup takutippaa innuttaaqataasut innarluutillit taakkulu qanigisaasa eqqumiitsuliat aqqutigalugit oqariartuuteqarnissamut piumassuseqarlutillu nakuussuseqarnerat. Tamanna qujamasuutigeqaara neriullungalu saqqummersitsinissaq innuttaasunit soqutigineqarluarumaartoq, Ilaqutariinnermut Inatsisinillu Atortitsinermut naalakkersuisoq Aleqa Hammond oqarpoq.
Saqqummersitsineq Katuami takutinneqassaaq 2007-imi maajip 13-ianniit 28-at ilanngullugu.
Innarluutillit pillugit ataatsimeersuarnissami inunnit 90-it missaanniittunit peqataaffigineqartussami sammisassatut qulequtaapput ilinniartitaaneq, suliffeqarneq sunngiffimmilu sammisassat. Siunertaavoq nukiit innarluutilinniittut sammineqarnissaat kiisalu peqataasut misilittagaasa ilisimasaasalu katersuuffiunissaat.