?Sillimasiineq akisoorujussuusinnaavoq
Biilertartuuguit inuusuttoq sillimmasiinermut akiliut qaffasissuuvoq
Benziina, iluarsaasarfimmut akiligassat, sillimmasiineq, biilip oqimaassusaanut akitsuut, biilisinissamut attartorneq...
Biili kisimi akeqanngilaq. Biilisinermi suut tamarmik attuumassuteqartut aamma akeqarput. Pingaartumillu biilip sillimmasernera akisuujusinnaavoq, siullermeerluni biilisisup naatsorsuutigisaaninngarnit.
- Assersuutigalugu angut 30-it inorlugit ukiulik pigutsigu siullermeerluni biilisisoq, angisuumillu assakaasuinik sisamanik ingerlatitamik pisisoq, taava biilip sillimmaserneqarnera ukiumut 20.000-25.000 koruunit akornanni akeqarsinnaavoq. Aningaasartuutillu tamakkua inuit tupaallaatigisarsinnaavaat, Nuummmi Sparbankimi inuinnarnut atuisunut pisortaq René Sørensen nassuiaavoq.
Aningaasartuutit taamak amerlatiginerannut pissutaavoq biilertartut inuusuttut biilertartunit allaninngarnit ajutoornermut akulerunnissaminnut ilippanaateqarnerunerat.
Aningaaserivik ullormut atuisartunit tallimat missaannit saaffigineqartarpoq biilisinermut atatillugu siunnersorneqarnissamik pisariaqartitsisunit.
- Tamanna pigajuttarpoq ilaqutariit meerartaaraangata imaluunniit Nuup qeqqaniit Nuussuarmut Qinngutsinnulluunniit nuukkaangata. Taava biilimik pisariaqartitsilersarput, René Sørensen tikkuaavoq.
Aningaasaqarneq piviusorpalaartoq
Alloriarnissaq tulleq tassaavoq ilaqutariit naatsorsuutigisaasa aningaasarsiornikkut piviusunut naleqqutsinnissaat. Sparbankip Grønlandsbankillu misigisimavaat aningaasarsiornerup siuariartornerata atuisartumik biilisisinnaanerat sunnersimagaat. Pisunili arlalinni siunnersuisut atuisartut qinnuigisariaqartarsimavaat anguniakkatik annikillisaqqullugit.
- Akuttunngitsumik atuisartoq biilitaarnissaminik sinnattugaqartarpoq periarfissallu annertuvallaartumik takorloortarlugit. Taassuma imaqa biilip akissaa pitsaasoq isumaqatigiissuteqarfigisimavaa, atuisartulli aningaasartuutit allat biilisinermut attuumassuteqartut akissaqartinngilai, atuisartunik siunnersuisartoq Brian Ahrens, Nuummi Grønlandsbankimeersoq nassuiaavoq. Misilittakkamigut aningaaseriviup nalunngilaa ilaqutariit Nuummiit Qinngutsinnut nuukkusukkunik missingersuutini biili inissaqartinneqassasoq. Taamaanngippat nuunnissaq piviusorpalaanngilaq.
Aningaaseriviit naliliipput pisut 75 procentiisa missaanni biilisinissaq taarsigassarsisitsinikkut aamma aningaasaliiffigisaritik. Taamaattoqaraangat aningaaseriviup piumasarisarpaa biili qulanaveeqqusiunneqassasoq.
Biilisinissamut atatillugu aningaaseriviit biilisinissamut taarsigassarsinissamut ataatsimoortumik neqerooruteqanngillat, pisuni tamani isumaqatigiinniartoqartarpoq.
Biilimut aningaasartuutit
Sparbankip naatsorsorsimavaa 175.000 aamma 200.000 koruunit akornanni akilimmik biilisinermi aningaasartuutissat tamanut atuuttut. Naatsorsuineq malillugu biilertartoq 30-t sinnerlugit ukioqarpoq siornatigullu biileqarsimalluni.
Ukiumut aningaasartuutit
Biilimut attartukkat 36.000 koruunit
Biilimut sillimmatit 8.000 koruunit
Motoorimut akitsuut 8.374 koruunit
Ikummatissaq 3.600 koruunit.