Aqqusinertigut angallarmut inatsisissaqukiup affaani kinguaattoorpoq

- Aqqusinertigut angallannermut inatsit ukiuni 15-ini atoreernikuugatsigu Kalaallit Nunaanni aqqusinertigut angallannermi inatsisitaassap akuersissutigineqarnissaata tungaanut ukiup affaani atoqqikkallarsinnaassavarput.

Inatsisartut Inatsiseqarnermut Ataatsimiititaliaat, Inatsiseqarnermut Ministeqarfiup Kalaallit Nunaanni aqqusinertigut angalannermut inatsisissatut siunnersuutaanik ukiaru ataatsimiinnissamut kinguartitsisimasoq taama isumaqarpoq.

Kinguartitsinerullu kingunerisaanik aqqusinertigut angallannermut inatsisissaq, pilersaarutit malillugit julip aallaqqaataaniunngitsoq, aatsaalli ukiut nikinneranni atuutilersinnaalissaaq.

Kalaallit Nunaat siullermik 1966-imi aqqusinertigut angallannermut inatsiseqarlersimavoq taannalu 1992-imi nutaamik taarserneqasimavoq.

Pissutsit allaanerusut
Illoqarnermut attaveqarnermullu naalakkersuisuusimasup Jørgen Wæver Johansenip, Siumut, Inatsisartut 2006-imi ukiakkut ataatsimiinneranni inatsit nutarterneqartariaqarnerarpaa:

- Aqqusinertigut angallannermut inatsisissaq biilit 1992-iminngaanniit amerlanerujussuanngorsimanerannut aqqusinertigullu angallanneq isumannaallisaaviginiarlugu assigiinngitsutigut aaqqissuussisoqarsimaneranut naleqqussarneqarsimassaaq.

Jørgen Wæver Johansen isumaqarpoq, aqqusinertigut angallannermut inatsisip allannguutissaasa politiit suliassaqarnerulersissagai.

Taamaattumillu inatsip allanngornissaa politiit suleriaasiata allangortiteriffigineqarnerannut attuumassuteqassaaq.

Taamaattoqanngippat tamanna kinguneqanerlussinnaammat:

- Innuttaasut ataasiakkaat aqqusinertigut angallannermi inatsisip piumasarisaanik malinnittariaqanngitsutut misigisimassappata aqqusinertigut angallannermi isumannaallisaaneq pitsaarpiarunnaassaaq, Jørgen Wæver Johansen oqarpoq.

Taanna martsimi Kim Kielsenimit, Siumut, kingoraarneqarpoq.

Qallunaat inatsisaat
Tamakkununnga tunngasut suli qallunaat oqartussaaffigaat, taamaattumillu Inatsiseqarnermut ministereqarfik Kalaallit Nunaanni aqqusinertigut angalannermut inatsip allannguutissaanik suliarinnittuusimavoq.

Kalaallit Nunaanni aqqusinertigut angallannermut inatsisip allannguutissai arlallit toqqaannartumik qallunaat inatsisaanniit tigusaapput.

Tamakkulu ilagaat soorlu bussit unittarfiisa immikkut mianerineqartarnissaat - biilit qulliisa ikumatinneqartarnissaat aamma ingerlatilluni mobiltelefuuninik tigummisoqartannginnissaa.

Bussit mianeralugit
Ajornartorsiutaavorli Kalaallit Nunaata aqqusinertigut angallannerup tungaaniit isigalugu nunarujussuunera.

Bussit unittarfiisa mianerineqartalernissaat Nuup Bussiini ingerlatitsisartut qujaruttorujussuussavaat, illoqarfinnili nunaqarfinnilu aqqusinertigut angallattoqarfiulluanngitsuni soqutigineqangaarnaviarani.

Inatsisartullumi 2006-imi ukiakkut ataatsimiinneranni aqqusinertigut angallannermut inatsisissaq pillugu Kalaallit Nunaanni Namminersornerullutik Oqartussat oqaaseqaataat oqallisigineqarmat partiit arlalinnik isornartorsiuillutik oqaaseqaateqarput.

Kommunillu tusarniaassutinut akissutaanni takuneqarsinnaavoq Nuummi, Nanortalimmi, Ilulissani Ittoqqortoormiiniluunniit aqqusinertigut angalannermi atukkat assigiinngeqisut.

Tusarniaaqqittoqassaaq
Inatsisartut 2006-imi ukiakkut ataatsimiinneranniit 2007-imi ukiakkut ataatsimiinnerup tungaanut Inatsiseqarnermut ministereqarfik tusarniaanermi akissutit imaannik ilisimatinneqarsimavoq.

Taamaattumillu Inatsisinut suleqatigiissitap Kalaallit Nunaanni aqqusinertigut angallannermi pissutsinik paasissutissinneqarnerunissani piumasarisimavaa, ilaatigullu tamanna pissutigalugu tusarniaaqqittoqassaaq.

Inatsiseqarnermut ataatsimiititaliap sapaatip akunnerani uani Illoqarnermut Attaveqarnermullu Pisortaqarfik illuatungeriit tusarniaassutigeqqusaannik ilisimatissavaa.

Tusarniaaffigineqartussat ilagissavaat aalisartut piniartullu kattuffiat KNAPK, savaatillit suleqatigiissut SPS sulisitsisullu peqatigiiffii marluk ILIK aamma N?USUKA (GA akissuteqareersimavoq).

Inatsiseqarnermut ataatsimiititaliaq
Naalakkersuisooqatigiit Arsarnerit sapaatip akunnerani kingullermi ajalusoornerisa kingorna Inatsiseqarnermut Ataatsimiititaliaq nutaanik inuttalersorneqarpoq:

Siulittaasoq Kristian Jeremiassen, Atassut, siulittaasup tullia Agnethe Davidsen, Siumut kiisalu Otto Jeremiassen, Siumut, Asii Chemnitz Narup, Inuit Ataqatigiit aamma Lene Knüppel, Demokraatit.

Kalaallit Nunaanni aqqusinertigut angallannermi inatsisissaq nutaaq ukiup affaanik kinguartinneqarpoq, Inatsisartut Inatsiseqarnermut Ataasimiititaliaata tusarniaaffigineqartut amerlineqarnissaat kissaatigimmagu.

Aqqusinertigut angallannermut inatsit Kalaallit Nunaannut tamarmut atuuttuuvoq, nunatsinni illoqarfiit pingaarnersaanni aammalu illoqarfinni mikisuni nunaqarfinnilu aqqusinertigut angallannermi pissutsit assigiinngitsorujussuupput.