Nerisaassani sullineqarmat uumasut nakorsaat takuniaavoq
Namminersornerullutik Oqartussani uumasut nakorsaat Helene Kronborg Ahlstrand Nuummi Café Crazy Daisymut misissuiartorpoq, tassunga neriartortoq nerisami akornanni sullinermik naammattuuimmat.
Taamatut allappoq Inuit-Nyt tallimanngormat.
Sullineq, uumasut nakorsaat malillugu niviugammut assingusoq, kukkuuaqqamik karryliami nassaarineqarpoq. Uumasullu nakorsaat nassaamik takutinneqarpoq, neriartortup sullineq assilisimammagu.
- Ulluni kingullerni kiakujussimavoq taamaattumillu ulluni taakkunani sullinerpaalunnik tukertoqarsimassaaq. Sap. akunnerani uani ullut ilaanni Crazy Daisymut nakkutilliisutut takuniaaniarpunga sullinernik akiuiniarneq paasiniarlugu, uumasut nakorsaat Helene Kronborg Ahlstrand Inuit-Nytimut oqarpoq.
Café Crazy Daisyp piginnittuata Jørgen Pedersenip ajuusaarutigaa neriartortoq nerisasssamini sullinermik nassaarsimammat. Taamaattoqaqqissanngitsorli qulakkeerumanngilaa.
- Sullinermut taamaattumut ajornartorsiutaavoq sumulluunniit qaquguluunniit pisinnaammat. Tamakkua pakkersimaarfigineqarsinnaanngillat. Nerisassanik taamatut amerlatigisunik sassaallertartilluta tamatgigut arlaannik ajortoqartassaaq, Jørgen Pedersen nassuiaavoq.
Nerisassanut oqartussaasut neriniartarfik kingullermik 2004-mi novemberimi takuniaaffigisimavaat.