Marlulissat ipigaluartut annaanneqartut
Sisimiuni qatanngutigiit aalisartunit marlunnit annaanneqarput
Nukappiaqqat marlulissat ippassaq ipigaluartut annaanneqarput, taamatut paasissutissiivoq KNR.
Annaassiniartup aappaa Aslak Jensen radioavisimut oqaluttuarpoq: – Kammalaatigalu Carsten Lingsimilu angallataaniippugut. Tassanngaannaq tusaalerparput umiarsualivimmi inuit suaartartut. Immitsinnut qiviarpugut angallatillu aappaanut ikipallariarluta aallarluta.
Sunaaffa nukappiaqqat marluk 3-nik ukiulillit sikukkut nakkarsimasut.
– Imaani "qernertuaqqanik" sikup ataanut sarfaassaalersunik takuvugut, Aslak Jensen oqaluttuarpoq.
– Marluullutik atallaaqarput. Nukappiaqqat marluk angallammut qaqivagut. Marluullutik uumanngillat anersaartoratillu.
Aslak Jensenip Carsen Lingsillu nukappiaqqat marluk uummataat aallartinniarsaraat nukappiaqqallu puaannit imaq milluarlugu.
Nunamukaappaat tamatumalu kingorna nukappiaqqat napparsimmavimmut biiliunneqarput.
– Qujanartumik nukappiaqqat marluullutik uummarput qissaserlutillu, Aslak Jensen eqqissiallassimaqisoq KNR-imut oqaluttuarpoq.