Sisimiuni erngup nukinganik nukissiorfik nutaaq

Suliassami maajip naanerani sanaartornissamut annertuumut atatillugu tammaarsimaffissamik sanaartorneq aallarniutaassaaq.

Erngup nukinganik nukissiorfik Tasersuaq-p eqqaaniissaaq, illoqarfiup avannaatungaani 27 kilometerisut ungasitsigisumiittumi, Utoqqarmiut Kangerluarsunnguaniittumut naleqqiullugu nunatsinni anginerit tulliusussaalluni, Nukissiorfiit tusagassiutitigut nalunaaruteqarpoq.

Illoqarfimmik pilersuineq pissaaq innaallagissamut aqqut 60 kV aqqutigalugu, kangerluk 1,2 kilometerisut ikertutigisoq ikaartussaallugu. Tatsimit, nunap iluani nukissiorfissap turbininik marlunnik 7,0 MW-inik (megawatt) nukissiorfeqartussami, qaartiterinikkut 5 kilometerisut isorartutigisumik sullorsualiortoqassaaq. Innaallagissiorfik ukioq 2010-mi naammassisussaavoq, naatsorsuutigineqarporlu pilersuineq 2010-mi 53 GWh-imit (gigawatttimer) missaannit 2020-mi 56 GWh-inut qaffassasoq, taamallu siunissamut.

Nukissiorfimmi Qullersaqarfimmit aamma Phil og Søn A/S-imit aallartitat ataasinngornermi 16. april-imit 19. april-imut Sisimiuniissapput, arlalinnik ataatsimeeqateqartussaallutik, ilaatigut kommunimik. Aammattaaq attaveqaatit, ineqarnermullu tunngasut misissussavaat, kiisalu kommunimi kiffartuussinikkut sullissisinnaasut suleqatigisinnaasatullu periarfissat suunersut misissussallugit.

Powered by Labrador CMS