Iluarinngiallallugillu - pillarujussuarlugillu
Nakkarsaasarneq Kalaallit Nunaanni sakkortusigaluttuinnarpoq. Internettikkut, atuarfimmi mobilikkullu
Kalaallit Nunaanni silarsuullumi sinnerani nakkarsaasarneq meeqqat inuusuttullu akornanni atugaagaluttuinnarpoq.
Sumiluunniit taamatut pisoqartarpoq. Atuarfinni, internettikkut, mobilikkut, sunngiffimmi imminnut tikillutik suliffinnilu.
Meeqqat atualerlaanut allaat taamaaliortarput.
Sooq? Akuerineqarumalluni. Immaqa assigiinngitsorpassuarnik peqquteqarluni. Ikinngutit atisaat uparuarsimagaanni, ikinngutit angutaataat arnaataalluunnit isigivallaarsimagaanni, immaqaluunniit ullut arlaanni mutiorpianngitsumik kiatilersimagaanni.
Nukappiaqqat niviarsiaqqallu assigiimmik nakkarsaasarput, niviarsiaqqalli naakkarsaanikkut eqqugaagajunnerusarput. Soorunalimi aamma nukappiaqqanik nakkarsagaasoqartarpoq, amerlanerpaatigulli niviarsiaqqat taamatut pineqartarput.
Ilumoortorli unaavoq nakkarsaaneq eqqarsartaatsikkut naalliuutinik kinguneqartarmat, nakkarsagaasimasut ikinngutitaarpiarsinnaasanngillat, aappartaarluarsinnaasanngillat allaallu ilaqutariinnik ataqatigiissitsinissaq sapersaatigisarlugu. Eqqugaasimasut amerlanerpaartaat imminnut tatiginngitsoorujussuanngortarput.
Nakkarsaasoq aniguisinnaanerusarpoq, ikinngutigiinnermiit mattussaasannginnami, ullut tamaasa kusanaatsumik uparuartorneqartannginnami imaluunniit ajattugaavissortannginnami.
Tamannarpiarluuna ersissutigalugu nakkarsaasartut amerlanerrpaartaat nakkarsaasartut.
Aammali allaqarpoq nuannariinnarlugu imaluunniit susassaaleqillutik taamaaliortartunik.
Nakkarsaaneq amerlanertigut meeqqat inuusuttullu akornanni makunniunnermik peqquteqartumik aallartittarpoq. Akoorusunnermik, allaat ilaat «sallinngorusullutik« qanorluunniit iliorumallersarmata.