Cyperspacekut angallatit tuniniarneqarput
www.opslagstavlen.gl angallatinik atornikunik tuniniaaviit annersaraat.
Angallatinik atornikunik pisineq tuniniaanerlu annertusigaluttuinnartumik internetikkut ingerlanneqartalerpoq, maannakkorpiarlu www.opslagstavlen.gl angallatinik 52-inik ussassaaruteqarpoq. Qupperneq nittartagaq Kalaallit Nunaanni angallatinik atornikunik niuerfiit annersarigaat Malene Rosing, www.opslagstavlen.gl-imeersoq oqarpoq - quppernerlu taanna ullormut 9.000-11.000-inik iserfigineqartarsimavoq.
Teknologi nutaaliaaleraluttuinnarpoq. Ullumikkut angerlarsimaffimmi qarasaasiakkut pisiniartoqarsinnaavoq, imaluunniit pigisanik tuniniaasoqarsinnaavoq.
- Inuppassuit www.opslagstavlen.gl atortarpaat amerlaqisullu uteqqittarput, pissutigalugu pigisatik quppernikkut nittartakkakkut tuniniartaramikkit. Annonce ataaseq taamaallaat 20 koruuninik akeqarpoq quppernermilu nittartakkamiitinneqartarluni ulluni 90-ini, imaluunniit atuisartumit peerneqarnissami tungaanut. Annonciliisup sukkasuumik inuppassuit attaveqarfigisinnaavai, tamannalu illoqarfimmi allagarsiivinnut annoncinik nivinngaaqattaarnermit akikinneruvoq, Malene Rosing oqarpoq.