Inuusuttorpassuit imminornissartik eqqarsaatigisarpaat
Misissuinermi 508-t peqataasimapput - inuusuttut misissuinermi peqataasut pingajorarterutaasa imminornissartik pimoorullugu eqqarsaatigisimavaat
MIPI - meeqqanik inuusuttunillu ilisimasaqarfiup Paarisa suleqatigalugu imminorniarnermik iliuutsit siunertaralugit immikkut misissuisimavoq.
Inuusuttut misissuinermi peqataasut pingajorarterutaasa imminornissartik pimoorullugu eqqarsaatigisimavaat, inuusuttullu 23%-ii imminoriaraluarsimapput.
Misissuineq 2004-mi Kalaallit Nunaanni Inuusuttut atugarissaarnerannik misissuinermik itisiliineruvoq, inuusuttut 15-18-inik ukiulillit 508-t immersugassanik apersorneqarsimallutik.
Misissuinermi inuusuttut 97%-iisa imminortarnermut apeqqutit akissuteqarfigisimavaat.
– Inuusuttut pingajorarterutaasa pimoorullugu imminornissartik eqqarsaatigisimavaat, niviarsiaqqat imminornissamik eqqarsaateqarsimasut nukappiaqqanit amerlanerullutik.
– Inuusuttut tallimararterutaat imminoriaraluarsimapput, taamatuttaaq niviarsiaqqat nukappiaqqanit amerlanerullutik.
– Inuusuttut tallimararterutaasa imminornissartik pimoorullugu eqqarsaatigalugulu imminoriaraluarsimapput.
– Inuusuttut aperineqartut imminornissamik eqqarsaateqarsimasut affai sinnerlugit imminoriaraluarsimapput.
Taamatut imminornissamik eqqarsaateqariarlutik imminoriaraluarsimasut Tunumi inuusuttunit 100-t 50-t sinneqarput, Kitaata avannaani 33%-it Nuummilu inuusuttut 15%-iinnaat Kitaatalu kujataani 20%-iinnaat imminoriaraluarsimapput.