Qimussimik angalanersuarmi arnannguaq peqataasoq
Persuarsiutaasariaqanngilaq, Thulemit tallimassaa ilisimasassarsiorluni angalanermi peqataanini pillugu Arnarulunnguaq isumaqarpoq. Maanna eqqaassutissaa napparneqassaaq
Knud Rasmussenip Canadamiit Nordvestpassage aqqusaarlugu Alaskamut (1921-24) qimussimik angalanissarsuani uia Iggiannguaq aamma peqataasussaagaluarpoq, ilisimasassarsiornerli aallartinngitsorluunniit sivikitsumik Nuummiinnerminni nualluummik toquvoq. Arnarulunnguarli aalajangerpoq peqataaginnarniarluni.
– Aallaqqaammut ilissi atorfissaqartipparsinnga, maanna ilissi atorfissaqartilerpassi, Knud Rasmussenimut oqarsimavoq.
Inughuit sisamat allat peqataasut 1923-imi martsimi ilisimasassarsiornerup affaa siulleq naammat angerlamut uterput.
Arnarulunnguulli illuatalu angutip inuusuttup Qaavigarsuaq Miteq-p Nordvestpassage aqqusaarlugu Beringstrædimut ukiup appaata affaani angalaneq peqataaffigaat.
– Arnarulunnguaq eskimuuni arnani siullersaalluni taamak isorartutigisumut angalavoq, Miteq-llu peqatigalugu kisiartaalluni naggueqatini tamaasa tikeraarsimavai, Knud Rasmussen atuakkani Qimussimik angalanersuarmi allappoq.
Toqusussaasimavoq
Arnarulunnguaq Knud Rasmussenip tiguartiffigisorujussuusimavaa, taamanikkullu arnanut atuagassiat nuimanersaanni Tiden Kvinder, qallunaat arnat Arnarulunnguup silarsuaanik allanartorujussuarmik takutitsiffigai.
Qatanngutigiinni niviarsiaqqani nukarlersaavoq toqusussanngortinneqarlunilu, ilaqutariit pilersuisutuvaat, ataataa, toqusimammat.
Suut tamarmik piareersimapput allunaasarlu qungasianut ivertinneqareersimavoq qatanngutaa nukappiaraq qissaseriataarmat pigiinnarumallugulu kimigiiserluni.
Qatanngutai allat qiaqataalerput arnaatalu toqutsiniartup siunertani taamaatiinnarpaa.
– Taamaasilluni Arnarulunnguaq annappoq.
Aviisimi atuarnerugit