Qamittoornermut silarluk pissutaavoq

Anorersuarujussuarnera pissutigalugu ippassaq unnukkut Nuuk nalunaaqutaq 18 missaani tamavimmi qamittoorpoq.

Utoqqarmiut Kangerluarsunnguannit innaallagissap aqqutai ledningit immikkut kassuttarput, tamatumalu kingunerisaanik innaallagissap aqqutaa nunamut pisoorlunilu kortslutertarpoq. Pisoq siulleq pivoq nalunaaqutaq 18.01 Utoqqarmiut Kangerluarsunnguannit 50,5 kilometerinik ungasissusilimmi, aappassaanillu pivoq nalunaaqutaq 20.06, taqqavani innaallagissiorfimmit 21,1 kilometerinik ungasissusilimmi.

Sila pissutigalugu Nukissiorfiit aalajangerpoq Nordhavnimi pissamaatitut innaallagissiorfiup pilersuinerup annersaa tigussagaa, qamittooqqinnissaq pinngitsoorniarlugu.

- Innaallagissiorfiup illoqarfik innaallagissamik pilersorpaa nal. 21.24-imiit unnuakkut nal. 03.13 tungaanut, Utoqqarmiut Kangerluarsunnguanni innaallagissiorfiup pilersuinermik tamakkiisumik tigusinissaata tungaanut. Inoqutigiit amerlanerpaartaat nal. 22 missaani innaallagissamik pilersorneqaqqilerput atuisartullu ataasiakkaat nal. 23.20 missaani pilersorneqaqqilerlutik, Nukissiorfiit Nuummi ingerlatsinermut pisortaat Ove Nielsen paasissutissiivoq.

Illoqarfiup immikkoortuisa ilaat allaninngarnit sukkanerusumik innaallagissamik pilersoqqinneqalerput, tamannalu atuisartut amerlasuut tupigusuutigaat.

Tamakkiisumik qamittoortoqaraangat illoqarfimmi netstationit tamarmik sektionikkaartumik ikkunneqassapput. Tamannalu piffissamik pisariaqartitsivoq, tassa netstationerpassuit orninneqassammata. Tamatuma sanatigut sila pissutigalugu sulineq kinguartinneqarpoq, tassa sulisunik tamakkununnga ingerlatsineq sulisunut isumannaannerpaamik pissammat, Nuummi Nukissiorfiit ingerlatsinermut pisortaat Ove Nielsen oqarpoq.

Powered by Labrador CMS