Pingaarnerutitaq:Avaanngunaq
Kalaallit Nunaanni innuttaasut ilarparujussui ulluni makkunani merianngupput. Ataatsikkut inuummarliornermut pissutaanngillat nerisassat asiunikut. Ippigusunneq pissuteqarpoq naalakkersuinikkut-allaffissornikkut siuttut narlanngunaannartumik ajortuliornerannik.
Ileqqorissaanngeqalutik inuiaqatigiit siuttui imminnut ajunngitsorsiassarsioqqipput. Tamatumuuna inatsisit malittarisassallu imatut aaqqissuussimavaat, illunik, inuiaqatigiit ataatsimoorlutik pigisaannik, akikitsuararsuanngorlugit pissarsisinnaalerlutik.
Namminersornerullutik?Oqartussat ukiuni kingullerni illorsuit pilerinartut akikitsuararsuanngorlugit tuniniartarsimavaat. Akikilliliinermu siumut pigissaarluareersunut ikittunut kisimi sammitinneqarpoq. Inuinnaat illunut pilerinartunut neqerooruteqarsinnaangillat.
Akerlianik maanna siusinnerusukkullu politikerit nuimasuut arlalippassuit atorfillillu immikkut toqqakkat maanna isikkivigissaartorujussuarni issiapput mitallerpasissumik qungujulallutik, tassami ersarissorsuarmik tillinniarsimagamik.
Annikitsuararsuarnik aningaasaliissuteqarlutik millionilinnik iluanaarutissarsisimapput, illu akeqanngingajavissumik pissarsiarisimasartik arlaanni tunigunikku.
Tamanna akaarnaappoq avaanngunarlunilu. Tamanna peqatigalugu takussutissavoq ileqqorissaarnerup suusupagineqalersimaneranut assersuutissaallunilu inuit ikittunnguit qanoq isillutik innuttaasunik uukapaatitsisinnaanerannik.
Pissutsinik tamakkuninnga pinngitsaalineqarluni naalakkersuisut siulittaasuat Hans Enoksen sap. akunnerani uani TV-kut pisortat tukkornersuat illersorniarpaa. Naakkinaq! Nunatta aquttuata arlaleriarluni pisimasoq malittarisassanik teknikkimillu nammineq ilisimasaqarfiginngisaminik tunngavilersoriaraluarpaa, ilumoorunarporlu angutip taassuma suut ilisimasaqarfiginerai.
Ullumikkut aviisimi saqqummersumi Namminersornerullutik?Oqartussat pisortaanerat Kaj Kleist nassuiaasinneqarpoq. Taamatut naakkinartigisumik, uppererusupparpulli erseqqissaatigimmagu illunik tunisinerit tamarmik pisarsimasut malittarisassat atuuttut malillugit. Inatsisinik unioqqutitsisimanermik unnerluussaqanngilagut.
Qatsutiinnarippununa qanigisanik ajunngitsorsisitsisarneq, politikkikkut siuttut atortuagaatt takuneqarsinnaasorlu ikinngutinik kiffartuussinernik ikittuinnarnullu iluaqutissalimmik aaqqissuussisarnernik. Mamianartuliornerillu, minnerunngitsumik naalakkersuisut siulittaasuata akuleruffigiuartagai, aliasuutigaavut.
Suli qanoq sivisutigisumik sianiilliornerit aqutsinerlunnerillu innuttaasunut atuutsinneqassappat? Suli qanoq sivisutigisumik politikkikkut aqutsinerlunneq, ileqqorissaassutsimik sumilluunniit atuiffiujunnaarsimasoq, akuersaassavarput?
Suli qanoq sivisutigisumik naalakkersuisooqatigiinnut isiginnaartuussaagut qangarsuarli - kikkunnit tamanit takuneqarsinnaasumik - aqutsisinnaajunnaarsimasunut? Qanoq sivisutigisumik akuersaaginnassavarput naalakkersuisooqatigiit siuttuisa piffissaq annertunerusoq atortaraat imminnut iluaqutissarsiornerminnut, ataatsimoortumik pisariaqartumillu politikkikkut suliniuteqarnerminngarnit?
Naalakkersuisuni inatsisartunilu politikerit sinneruttut pimoorussisut assuarnaatsullu qinnuigaavut qanoq iliuuseqaqqullugit. Naammaleqaaq!