Ukiumut meeqqerivik ataaseq
– Maani Nuummi meeqqerivinni pissutsit pitsanngorsarusoqaagut, Nuup Kommuneani Meeqqanut kulturimullu ataatsimiititaliap siulittaasua Malînànguaq M. Mølgaard oqarpoq.
– Taamaattumik meeqqerivinni sulisut pikkorissartinnissaannut ukiut tamaasa aningaasaliissuteqartarpugut, ataatsimiititaliamilu akuttunngitsumik oqaloqatigiissutigisarlugu pissutsit pitsanngortinnissaannut qanoq iliortoqarsinnaanersoq. Meeqqerivinni tamani »Ukiumi sulisutsialak« eqqussimavarput, taamaasilluni perorsaasutut sulineq pilerinarnerulerseqqullugu nuannernerulerseqqullugulu. Aamma pissutigalugu sulisut misigisimaniassammata pingaartinneqarnerullutik.
– Ukiuni tulliuttuni marlunni Jagtvejimi Qernertunnguanilu meeqqerivinnik marlunnik sanasoqarlunilu pilersitsisoqassaaq. Pilersaarutaavorlu ukiut tamaasa Nuummi meeqqerivimmik ataatsimik sanasoqartassasoq. Taamaasilluni meeqqerivinnut utaqqisarneq sivikinnerulissalluni.
– Nuannerpoq angajoqqaat namminneq suliniuteqarlutik ataatsimiititsisarnerat iliuuseqarlutillu aalajangiisartut akornanni pitsaanerusumik suleqatigiittoqarnissaanik. Nalunngilarput meeqqerivinni siulersuisut tamatigut ingerlalluarneq ajortut, taamaattumillu pitsaasuuvoq angajoqqaat namminneq iliuuseqartarnerat qitornamik ulluinnarni atugaat pitsaanerulersinniarlugit, Malînánguaq M. Mølgaard oqarpoq.