Sermersuakkoorneq navianartoq

Ole Jørgen Hammeken angalaqataalu Ilulissat tungaanut sermersuakkut aqqutissarsiorput.

Ole Jørgen Hammeken paninilu Pipaluk - taannali angalaqataanngilaq.

Angalaqatigiit Ilulissanut qimussimik aqqummik nutaamik nassaarniartut maanna sermersuup qaanut pisimalerput, quppallu ulorianartut avaqqullugit aqqutissarsiussallutik.

Tallimanngormat unnukkut angalasut sermersuarmut 20 km.-inik appakaassimapput, arfininngornermili tutsaqanngillat. Ilulissat tungaanut aqqutip navianarnersaat tikippaat, naatsorsuutigaallu sap.ak. miss. ingerlaassallutik.

– Aqqutitsinni siumugassagut suussanersut nalulluinnarparput, silali ajussanngipat sap.ak. miss. ingerlaassalluta naatsorsuutigaarput. Allat tamaanaarlutik ajunaartarsimasut, soorlu Alfred Wegener angalqataalu kalaaleq Rasmus Willumsen eqqaamallugit mianersorluinnarluta ingerlaassaagut. Qamutivut imminnut qilersorsimassapput, uagullu immitsinnut aamma qilersorsimassalluta, aallanngitsiarlutik Ole Jørgen Hammeken oqaluttuarpoq.

Silaannaap kissatsikkiartornera pisuulluni Uummannamiit Ilulissanut aqqutitoqaa ingerlavigineqarsinnaajunnaarsimavoq, taamaattumillu sermersuakkoortariaqarluni.

Powered by Labrador CMS