Imeq qalallugu
Eqalugaarsunni imeq ajoquteqarpoq.
Qaqortup eqqaani Eqalugaarsunni kuutsivimmi erngup misissorneratigut paasineqarpoq imeq colibakteriaqarpallaartoq.
Taamaattumik Nukissiorfiit nunaqarfimmi innuttaasunut kajumissaarutigaa imeq imertinnagu qalaattaqqullugu. Qaqortumi Nukissiorfimmi sulisut aqagu pingasunngornermi nunaqarfimmut tassunngassapput erngup aqqutai kuutsiviillu klorimik salikkiartorlugit.
Tamatuma saniatigut Nukissiorfiit Kujataani nakorsaqarfimmi nakorsaaneq suleqatigalugu imermik misissugassamik tigusiniarput ataavartumik misissorneqartartussamik, taamatut Nukissiorfiit unnuk manna paasissutissiivoq.
Colibakteriat suna pissutigalugu annertusisimanerat suli ilisimaneqanngilaq. Nukissiorfiilli Qaqortumi ingerlatsinermut pisortaa Søren Pedersen naliliivoq bakteriat amerleriarnerannut pissutaasinnaasoq Kujataani februarimi annertunerusumik siallersimanera. Januarimi nunaqarfik imeruerutingajappoq decemberimi januarilu naallugu sialukippallaarnera aputikippallaarneralu pissutiglugit. Taamaattumik imeqanngingajariarluni siallerujussuarneratigut atortussat avataaniittut tatsimut kuugussaasimasinnaapput.
Nukissiorfiit qinnuteqarsimavoq 2008-mi erngup aqqutaata taarserneqarnissaanik UV-anlægimillu (Utravioleteanlæg) ikkussisoqarnissaa, nunaqarfimmi erngup mingoqassusia annikillisarniarlugu.