Unnuakkut nipiliortarneq unitsinneqangajalerpoq
Borgmesterip Tuapannguani najugallit neriorsorpai unnuakkut eqqissisimasalissasut.
Nuup Kommunea maanna kioskimut ulloq unnuarlu ammasartumut iliuuseqarnialerpoq, Nuummi Tuapannguani najugallit taanna sivisuumik maalaarutigisarsimammassuk. Sanilit maalaarutigaat unnuakkut tamaani nipiliortoqartarnersua, tassa meeqqat inuusuttullu kioskip unnuakkut ammanerani taassuma eqqaani nipiliortarmata.
Borgmester Agnethe Davidsen Nuuk Ugeavisimut oqarpoq qamutit pizzaarniarfiit, kioskip ulloq unnuarlu ammasartup sanianiittoq maanna peerneqarsimasoq.
– Tuapannguit najugaqarfiuvoq najugaqartut eqqissisimaffigisariaqagaat, taamaattumillu illoqarfiup immikkoortuanut tassunga pilersaarummi aamma ilanngunneqarsimavoq tamaani ingerlatsivimmik taamaallaat ingerlatsisoqarsinnaasoq, taanna tamaani najugaqartunut akornutaanngippat. Taamaattumik nuannaarutigalugu najugaqartut nalunaarfigisinnaavakka kommunip ajornartorsiutit, kioskip ulloq unnuarlu ammasartup plersitai arajutsisimanngivikkai, taassuminngalu piginnittoq suleqatigalugu qularnanngitsumik aaqqiissutissamik nassaarsinnaavugut qaammatip ataatsip missaata ingerlanerani, tamanut akuersaarneqarsinnaasumik, borgmesteri oqarpoq.