Persuttaasarneq unitsilli!
Angutit arnanit timikkut nukeqarnerupput. Uumassuseqartutigut pinnguutit aamma timip sananeqaatai eqqarsaatigalugit tamanna piviusuuvoq. Ajoraluartumik angutit amerlavallaartut ilaanneeriarlutik tamatuma uppernarsarnissaanut pisariaqartitsisutut ittarput, Astrid Fleischer Rex allappoq.
– Arnanik persuttaasarneq tamarmiusoq minnerunngitsumillu uiusut, inooqatigisat angutaatilluunniit aapparisaminnik persuttaasarnerat akuerisinnaanngilluinnarpara, Astrid Fleischer Rex Demokratineersoq tusagassiutinut allappoq.
– Isatsinneq. Tillutsinneq. Isimmitsinneq. Arnanik persuttaasarneq assigiinngitsorpassuartigut pisarpoq. Tamarmik ataatsimoorutigaat qunutitsinerugamik nikanarsaanerullutillu.
– Ataatsimoorluta persuttaasarneq isumaqanngitsoq – angutaasernerit isumaqanngitsut – arnat ullut tamaasa ukioq kaajallallugu misigisartagaat unitsinniarlugu akiuutta. Tamatta qanoq iliuuseqarsinnaavugut persuttaasarneq unitsinniarlugu.
– Isumaga naapertorlugu isummanik pissusilersornernillu allanngortitsinissaq annertuumik pineqarpoq. Sanilip, atilip immaqaluunniit allaat qatanngutip arnaasup nassuiaruminaatsunik tungujornerqartiternera oqaasertalinngikkaluarlugu isiginnaaginnassallugu ajunngitsutut isigineqarunnaartariaqarpoq. Isiginngitsuusaarutsigu arnanik persuttaasarnerup ingerlatiinnarneqarnera akisussaaqataaffigissavarput, Astrid Fleischer Rex allappoq.