Kikkut tamarmik Agnethe nuannareqaat

Nuup borgmesteria tupinnaannartumik nuannarineqarpoq. Naliliissummit 1-miit 10-mut, 1 tassaalluni "ajorluinnartoq" 10-lu tassaalluni "ajunngilluinnartoq", Agnethe Davidsen, Siumut, borgmesteritut sulinerminut 8,1-imik karakterilerneqarpoq. Tamanna takuneqarsinnaavoq Nuummi innuttaasut 615-it apersorneqarnerisigut, HS Analysep ingerlataanik.

Sanilliussassatut naalakkersuisut siulittaasuat Hans Enoksen, Siumut, agguaqatigiissillugu 4,8-mik karakterilerneqarpoq, innuttaasut nunamit tamarmeersut 2006-imi ukiakkut taamatut nalileqqullugu qinnuigineqarmata.

HS Analysep aamma Nuummi innuttaasut 615-it aperisimavai ullumikkut kommunalbestyrelsimut qinersisoqartuuppat kina taassagaluarneraat. Aperineqartulli affangajaat kommunimi politikkersorneq eqqarsaatigalugu partiinik nuannarisavissuaqanngimmata, qinersisartut agguaassinerat eqqorluartumik uppernartumillu takutinneqarsinnaanngilaq.

Misissuinikkulli partiinik ilersuinermik takussutissaqalaarpoq:

Partiimik aalajangersimasumik tikkuussisunit Demokraatit aamma Inuit Ataqatigiit 30-35 procentinik tapersersorneqarput. Siumut 20-25 procentinik tapersersorneqarpoq Atassullu 5-10 procentinik tapersersorneqarluni.

Kommunimili politikkimi inunnik taaguinerit pingaaruteqartorujussuupput, eqqarsaatigissagaannilu borgmester Agnethe Davidsen taamatut nuannarineqartigisoq naatsorsuutigineqarsinnaavoq nammineerluni Siumumik taasisut amerliserujussuassagai.

Partiinut tamanut atuuppoq kommunimut qinersinissami iluatsitsinissamut apeqqutaangaatsiarmat partip inuit kikkut qinigassanngortinnerai.