Tilliffigitinnaveersaarit - pigisatit nalillit angerlaatikkit
Angallatinut tillinniartarneq ajornartorsiutigillattaartarparput, Ilulissani politeeqarfiup pisortaa oqarpoq.I perioder er der problemer med tyveri fra både, siger stationslederen hos politiet i Ilulissat.
Aasaanerani nammineq angallatit atorlugit angalaartarneq inuppassuarnut nuannersorujussuusarpoq. Piffissaq sivisunngiummat atorluarneqarusuttarpoq.
Kisiannili! Nuannisaarnerpit aasaanerani tillinniartartunit aserorneqarnissaa kissaatiginngikkukku upalungaarsimagit.
Ilulissani politeeqarfiup pisortaa Janus Eigaard taamatut siunnersuivoq. Politiit aasaanerani tillinniarfigineqarnernik nalunaarfigineqarnerpaasarnerarpai.
- Angallateeqqat atorlugit angalaartoqartaleraangat angallatinut tillinniartoqartalersarpoq. Sodavandit, aallaasit, motorit atortui, qaleralinniutit benzinallu angallatiniit tillinneqartarput. Imappoq suarsunniit nalituunut.
Suliassat ilaat paasineqartanngillat, ilaalli - pingaartumik politiinut unnerluttoqariaraangat - paasineqartarlutik.
Nalillit angerlaattarlugit
- Tillinniarfigitikkumanngikkaanni qanoq iliortoqartassava?
- Pigisat nalillit angerlaanneqartarsinnaapput. Amerlaqisut aallaasitilluunniit angallammiitiinnartarpaat, tamannalu ajorluinnaqqissaarpoq. Nalilinnik angallammiittoqanngippat aamma tillinniartoqarnavianngilaq.
- Sinerissami angallateeraatileqatigiiffiit ilaasa, soorlu Maniitsumi, angallatit pituttarfii ungaloqartittarpaat. Pituttarfiit matui parnaarsaarsinnaagaanni aatsaat pituttarfinnut isertoqarsinnaasarpoq, taamaalillutillu tillinniat isernissaat ajornarnerulersarpoq. Tamanna tillinnianut isumannaallisaataavoq pitsaasoq, Janus Eigaard oqarpoq.
- Maani Ilulissani ungaloqanngillat, ukiumilumi imaq sikugaangat angallatit orniinarlugit misissuiffigineqarsinnaalersarput.
Janus Eigaardip aamma oqaatigaa, ataqqeqatigiinneq aamma ikioqatigiinnerusartoq.
- Innuttaasut ikioqatigiittariaqarput. Inuk takornarnaq sanilerisap angallataanik misissuisoq takugaanni taanna peeqquneqarsinnavoq, Janus Eigaard oqarpoq.