Ukiuunerani angalaneq sapinngitsunuinnaq

Godthåb Bådeforening Nuup Kommunealu tamarmik ukioq manna puttasumik talittarfimmik ataasiinnarmik imaaniititaqarput.

2007 silarlulluni aallartikkaluartoq Kalaallit Nunaanni ukioq ullorpassuaqarpoq angalaffissaqqissunik ullunik issittunik allaaqqiffiusunillu.

Angallataatillit amerlanerpaartaasa angallatitik novemberimi nunamut qaqittarpaat, ilaasali sapinngitsut ukiuunerani angalaneq nuannarisuuvaat.

Ukiuni arlalinni uninngareerluni Godthåb Bådeforeningip ukioq manna angallaffimmi ilaasortat kissaataat malillugu talittarfik puttasoq ataaseq imaaniitiinnarsimavaa.

Taamaattumik Godthåb Bådeforeningip ilaasortaanit 800-900-nit angallatit 35-40-t suli imaaniipput; Iggiaani Talittarfik B-mut pitussimallutik.

Angalalluni
Talittarfimmi naapipparput Ville Barbarusiussen, angallamminik Skelsø 23-imik ukiuunerani imaaniititsiinnarsimasoq.

Angallat 1977-imeersuuvoq, Ville Barbarusiussenillu 1992-imi pisiarisimavaa.

- Angallatinni akunnerpassuarni nuannisartarsimaqaanga, Ville Barbarusiussen oqaluttuarpoq.

Angallataa Skelsø sukkasoorsuunngikkaluarpoq taamaallaat 7-8 knobinik sukkassuseqarluni, taavali angalanerit ukiup qanoq ilineranut naleqqussarneqaannassapput.

- Aasakkut kangerlummi kujammulluunniit angalasarpunga. Ukiukkut ullukilligaangat Nuup eqqaaniiginnartarpunga.

- Ukiuuneranimi angalaneq nuannarilluakkat?

- Ullormi issittumi ersarissumi angalaneq nuannareqaara,, soorunalumi puisinniarneq, appanniarneq aqisserniarnerlu - aammalu martsimi qeqertani terianniarniarneq.

Ville Barbarusiussen angalasarnerminut atatillugu ukiuni arlalinni immap kissassusia uuttortartarsimavaa.

- Ukiuni kingullerni Nuup eqqaani imaq ukiuunerani 4 - 5 gradinik kissatsissimavoq. Immaqa nunarsuup kissatsikkiartornera aamma Kalaallit Nunaanni malunniutilersoq...

Piniarluni
Ville Barbarusiussenip ukiuunerani angalasarneq pillugu oqaloqatiginerani Morten Heinrichip angallanni Saga 25 «Ringi« Talittarfik B-mut pituppaa.

Morten Heinrich Godthåb Bådeforeningimi ilaasortanit aliikkutaralugu angalasartunit allaanerusumik ukiuunerani angalaneq atortarpaa.

Taanna inuussutissarsiutigalugu piniartuuvoq, ukioq mannali kommunip Qasapimi (Puulukip Nuuani) talittarfianit Iggiaanut nuussimavoq.

- Qasapimi tattuunnartorujussuuvoq, ilaanneeriarlutillu angallatit avaleriiaat aappaannut pingajuannulluunniit pituttariaqartarputit, Morten Heinrich oqaluttuarpoq.

Taamaattumik Iggiaanut nuunniarsimavoq, angallami inaa tusintinik marlussunnik akeqaraluartoq.

- Iggiaani inissaqarneruvoq angallammullu tamanna pitsaaneruvoq.

- Ullumikkut sunik pisaqarpit?

- Nuup kujataani puisit marluk, ippassarli qulingiluaraarpunga!

Atortunut nungullarnartoq
Ukiuunerani angalasarneq angallammut nungullarnartarpoq.

Silarlukkaangat angallataatillit Iggiaanukartariaqartarput angallammik pitussimanerat misissoriartorlugu - nalunaaqutaq qanorluunniit isigaluarpat.

Akissarsiassartaraa ukiukkut silaginnerani angalasarneq.

- Talittarfinnik puttasartunik pisoqqanik marlunnik peqarpugut aappaa ukiuunerani talittarfittut atorneqartarluni, Godthåb Bådeforeningimi havnemester Poul Krohn oqaluttuarpoq.

Ville Barbarusiussen angallamminut Skelsø 23-imut ukiuunerani talittarfimmi inissaqartinneranut 1.821 koruuninik akiliisarpoq, Morten Heinrich Saga 25-iminut 2.202 koruuneertarluni.

Vil 19 1.177 koruuneqarpoq, umiatsiaaraq mikinerpaaq, Crescent 16 691 koruuneqartoq.

Godthåb Bådeforeningimi angallammut inissamik perusukkaannbi pisariaqarpoq akisussaanermut sillimmateqarnissaq.

Tamatuma saniatigut nammineq piumassutsimik kaskoforsikringeqassaaq.

Inissat akeqanngitsut
Nuup Kommunea aamma Qasapimi ukiuunerani talittarfiuteqarpoq puttasartumik, inuussutissarsiutigalugu piniartutut allagartalinnut naatsorsuussaasumik.

Tassunga pingaartumik tulaassisarput umiatsiaararsortut pisaminnik, kalaalimineerniarfimmi tuniniagassanik.

Talittarfik ulikkaavittarpoq angallatillu anginerit ilaat umiarsuaaqqat talittarfiannut nuussimapput.

Kommunip ukiuunerani talittarfiata atornera akeqanngilaq.

Powered by Labrador CMS