Hashi pillugu suliaq: Pingaarnertut unnerluussamut unnerluussisoq minnerpaamik ukiunik arfinilinnik piumaqarpoq

Illersuisoq sivikinnerujussuarmik pineqaatissiisoqarnissaanik piumasaqarpoq. Unnerluussutip ilarujussuanut unnerluussisoq uppernarsaatinik amigaateqartoq, taanna isumaqarpoq.

Minnerpaamik ukiuni arfinilinni pineqaatissinneqarsimasut inissiisarfianni. Hashi pillugu suliami annertuumi, inuit arfineq-marluk katillugu 60 kiilumik hashimik anngiortumik Nunatsinnut eqqussisimasutut unnerluussaaffigisaanni, unnerluussisussaatitaasup Tobias Bergip angummut tunuliaqutaasutut nalilikkaminut piumasaraa.

Hashi pillugu suliami unnerluussut

Hashi pillugu suliami unnerluussut pingaarneq pisunut pingasunut agguataarneqarpoq, taakku piffinni assigiinngitsuni pingasuni pisimapput.

Pisoq 1: Allagaq unnerluussut naapertorlugu 7. juuli 2015-ip aamma 6. novembar 2015-ip akornanni pisimavoq. Taakku tassani Danmarkimi Nunatsinnut hashimik 6,8 kiilumik eqqussisimanerarneqarput. Taakku poortukkan arfinilinni nassiunneqarsimanerarneqarput, unnerluutigineqartut marluk Nuummi allakkerivimmi tigusimavaat. Unnerluussisussaatitaasup uppernarsaataani pingaarnerpaavoq poortukkani adressimut immersuiffiit allaffigineqarsimasut. Taakku ilimanaateqarluinnartumik unnerluutigineqartumut ataatsimut attuumassuteqartinneqarsinnaapput. Piffissamilu tassani aamma Danmarkimut aningaasanik nuussisoqartarsimavoq. Poortukkanik hashimik nassaartoqanngilaq.

Pisoq 2: Allagaq unnerluussut naapertorlugu 7. novembar 2015-ip aamma 31. decembar 2016-ip akornanni pivoq. Taakku tassani hashimik 27,6 kiilumik Nunatsinnut eqqussuisimanerarneqarput. Unnerluunneqartup ataatsip Danmarkimi kontunut marlunnut 966.000 koruunit nassiussimammagit unnerluussisussaatitaasup uppernarsaataani pingaarnersaapput. Aningaasat taakku Christianiami hashimik pisinermut atorneqarsimassangatinneqarput. Piffissami tassani poortukkanik nassaartoqanngilaq.

Pisoq 3: Allagaq unnerluussut naapertorlugu januuarip aallaqqaataata 2017-ip aamma 24. juli 2017-ip akornanni pisimanerarneqarpoq. Tassani unnerluutigineqartut hashimik 27,1 kiilumik poortukkanut arfineq-pingasunut agguakkanut Nunatsinnut nassiussisimapput. Poortukkat marluk 2 kiilunik aamma 5 kiilunik hashimik imaqartut akitsuuserisunit tiguneqarput. Unnerluutigineqartup ataatsip poortukkat adressemut apuutinnginnerini allakkerivimmi tigunissaat suliassaraa. Unnerluussisussaatitaasup tassani ilaatigut allattariaatsip sanilliunneqarneri, assaat ipai, aningaasanik nuussinerit, oqarasuaatikkut immiussinerit aamma videokkut immiussat uppernarsaatissarai.

Tamatuma saniatigut pisut arlallit ataatsip arlaqartulluunniit unnerluussuteqaatigaat.

Ullumi marlunngornermi suliamini tamanna nassuiaatigaa.

29-nik ukiulik unnerluussisup isaanit inuit arfineq-marluusuni aqutsisuulluni anngiortumik hashimik eqqussuinermik tuniniaanermillu aaqqissuisuusimavoq. Allagaq unnerluussut naapertorlugu arfiniliusut ‘taassuma ilitsersuineratigut iliuuseqartuupput’.

Nalinginnaasumik pineqaatissinneqarnissamut tulluartoq

Unnerluunneqartup sianissusaata misissorneqarnerata kingorna nakorsateqqartuussinermi siunnersortaasartut nalunaarusiaata utaqqineqarnera pissutigalugu pineqaatissiissummut suliap ingerlanerata sivisuneranut pissutaavoq. Taanna 29-nik ukiulik inerisimannginnermik aamma allanngorartumik isumaqartutut nakorsat eqqartuussinermi siunnersortaasartut naqissuseraluaraat, nalinginnaasumik pineqaatissinneqarsinnaanera aalajangiunneqarpoq.

Killiligaanngitsumik eqqartuussuteqarnissamut tunngavissaqanngitsoq, siunnersusoqatigiit isumaqarput.

Nakuusernermut aamma sioorasaarinermut unnerluussutit

Haship anngiortumik eqqussorneqarnerata saniatigut, taanna angut aamma nakuusernernut, sioorasaarinernut aamma politiinut kanngunarsaanermut unnerluutigineqarpoq.

Tobias Bergeip ingammik inummik saassussimanera ataaseq unnersuussutigaa, taanna ilisimajunnaartiineqarsimavoq, tallualu napisimalluni.

Unnerluussutit taakku pillugit, aamma unnerluussisup tunuliaqutaanerarmagu, sinnerinut minnerpaamik tallimanut piumasaqarnerminit annerusumik piumasaqarpoq.

Illersuisoq uppernarsaatinik ujartuivoq

Minnerpaamik ukiut arfinillit piumasarineqartut amerlavallaarujussuartut, illersuisoq Miki Lynge isumaqarpoq. 29-nik ukiulik unnerluussutit marluk annikinnerusut politiinut sioorasaarinini oqaasipilunninilu kisiisa pinnagit, sinnerini suli pinngitsuunerarpoq.

Kisianni taassuma sullitaa eqqartuunneqassagaluarpat, hashimik anngiortumik eqqussinermut atatillugu pisumi 1-mi aamma pisumi 2-mi (paasissutissat takukkit) eqqartuutissallugu tunngavissaqanngitsoq taanna isumaqarpoq. Unnerluussisussaatitaasoq hashimik eqqussuisoqarneranit uppernarsaatinik amigaateqartoq, taanna isumaqarpoq.

Miki Lynge illersuisullu sinnerisa eqqartuussivik matumani isumaqataatissagunikku, taakku hashit 58,5 kiilut annerpaamik 27,1 kiilunut ikileriassapput, tamannalu sakkukinnerusunik pineqaatissiinermik kinguneqassaaq.

Illersuisup pineqaatissiissutip sakkortussusissaanik eqqartuussivik aalajangiinissaanut piumasaqarpoq, kisianni ukiunit arfinilinnit unnerluussisup piumasaanit sakkukinnerujussuunissaa naqissusiinnarpaa.

Arnaq 27,1 kiiluni pineqartuni taamaallaat ilaasimasutut unnerluutigineqarpoq. Taassunga tunngatillugu unnerluussisussatitaasoq ukiuni pingasuni qaammatinilu qulingiluani pineqaatissinneqarsimasut inissiisarfianniitinneqarnissaa piumasaraa.

Sapaatip-akunnerata naanerani imaluunniit sapaatip-akunnerata tulliani suliami eqqartuussuteqartoqarnissaa naatsorsuutigineqarpoq.

Powered by Labrador CMS