Disko Linep kujataani angalanermut pilersaarutini iluarsissavaa

Naalakkersuisut Disko Line oqaloqatiginiarpaat, taassuma taamaalilluni angalanermut pilersaarutini Nanortalimmit Qaqortumut sinersortaatip Qaqortumut tikittarneranut tulluartumik iluarsiniassammagu

Tamanna Simon Simonsenip paragraf 37-mut Siumumeersumut Anders Olsenimut akissutaani atuarneqarsinnaavoq.

Siunnersuut itigartinneqartoq

Sinersortaatip Sarfaq Ittuup angalasarnera sivitsorlugu Nanortalik tikittalissagaa, Anders Olsen siunnersuuteqarpoq. Isumassarsiap tamatuma avannaanut angalasarneranut sunniuteqassaaq.

Tassami sinersortaatip angalanermut pilersaarutaa aamma umiarsualivinnut tikittarnerata allanngortinnissaa ajornaatsuinnaanngilaq.

Angalanermut pilersaarut umiarsuup sukkassusaanut aamma umiarsualivimmiinnerata sivisussusaata pitsaaninngortinneratigut aaqqissuunneqareerneranik tamanna pissuteqarpoq.

- Umiarsuaatileqatigiiffiup sukkulluunniit imarsiornermut inatsisit inuttallu qasuersaarnissaannut aalajangersakkat tamaasa malittussaavai. Qasuersaarnissamut aalajangersakkat assersuutigalugu unnuakkut tikittarnissamut ajornakusoortitsipput, inuttat amerlanersaat qasuersaartartussaammata, Simon Simonsen taama akissuteqarpoq.

Akunnerit 13-it angalaneq

Nanortalimmut tikittalerneq Kujataani angalanermi sikut silalu pitsaanerpaaffianiitillugit akunnernik 13-inik sivitsuinermik kinguneqassaaq.

- Maanna siumut utimullu angalasarnerup iluani Nanortalik tikinneqartalissappat, avannaanut angalasarnermi lIulissat peerneqartariaqassaaq.

Nanortallip aamma Qaqortup akornanni Disko Linep sinersortaammik tikittarnini aallartarnerninilu angalanermut pilersaarutimi tulluarsarnissaanut tamanna nassuiaatissartaasoq, Simon Simonsen isumaqarpoq.

Powered by Labrador CMS