Atassut: Tunu immikkut kommuninngortariaqarpoq

Tunumi ineriartortoqassappat Tasiilaq aamma Ittoqqortoormiit Kommuneqarfik Sermersuumit avissaartariaqarput, Atassutip Inatsisartunut qinersinissamut sassartitaa, Aqqalu Jerimiassen taama oqarpoq.

- Kommuneqarfik Sermersooq piulermalli tunumiortatta nilliaateqartarnerat ersarippoq. Namminerlu uanga Qaasuitsup kommuniani najugaqartuunikuullunga ilisimalluarpara qanoq kipiluttunartiginersoq innuttaasuulluni tusaaneqaranili.

Aqqalu Jerimiassen Atassummeersoq qineqqusaarummi taama allappoq, Tunu Kommuneqarfik Sermersuumut ilaajunnaartariaqartoq, aamma Tunumi kommuneqalertariaqartoq, taanna isumaqarpoq.

- Tunumiortagut nunaqqatigaagut, kitaaniilli aqunneqarnerup katataagaluttuinnarnermik nassataqalersissimagai tusarliunneqarneruleraluttuinnarpoq ukiuni kingullerni arlalialunngulersuni. Tamannalu tusaanngitsuusaaginnarneqassappat tupinnartuussooq aammattaarlu tamat oqartussaaqataanerannik sumiginnaanerussalluni, Aqqalu Jerimiassen erseqqissaavoq.

Ineriartortinnermik kikkut tamarmik peqataatinneqassasut, taanna oqarpoq.

- Politikkikkulli ingerlatsinermi pissusissamisoorsorinanngilaq illoqarfittut sunniuteqarsinnaassusaat ineriartorsinnaassusaallu appasinnerpaamut inissinneqartassappat. Tamannalu pillugu Tunu immikkut kommuninngortariaqarnera oqariartuutigerusullugu, Aqqalu Jerimiassen oqarpoq.

Powered by Labrador CMS