Kangerlussuaq: Mittarfimmi amigartoorutit Kielsenip akilerniarpai
Ilulissani aamma Nuummi mittarfiit tallineqarnissaat Kangerlussuarmi mittarfiup taartissaatut sanaartorneqassanngillat.
Mittarfiit marluk tallineqarnerisa kingorna aamma angallannerup allanngornerata kingorna, Kangerlussuarmi mittarfik ingerlanneqarnermigut amigartoorujussuaraluartussanngoraluarpalluunniit matuneqassanngilaq.
Mittarfik amigartuussagaluarpat ‘’nammineq napatissinnaanngornissami tungaanut’’ nunap karsianit akilerneqassasoq, Siumumi siulittaasoq Kim Kielsen Sermitsiaq.AG-mut oqarpoq.
Siusissukkut neriorsuut
Ilulissani, Nuummi aamma Qaqortumi mittarfiliortoqarnerata inuiaqatigiit aningaasaqarneranut qanoq sunniuteqarnissaat pillugu nalunaarusiap paasissutissiisussamik attaveqaqatigiinnermut naalakkersuisoqarfik nalunaarusiamik naammassinnileruttorneranni, Kangerlussuup amigartoorutaanik akiliinissamik qinersinissamut neriorsuuteqarneq pivoq.
Qeqqata Kommunia takornariaqarnikkut annertuumik periarfissaqarmat, Kangerlussuarmi mittarfik sumiiffimmut takornarissat angallannerannik tunngaveqartumik niuernikkut ingerlanneqarsinnaasoq, Kim Kielsenip qularutiginngilaa.
Piffissaqarluartoq
- Pilersaarutit malillugit Ilulissani aamma Nuummi mittarfissat ukiut pingasut qaangiuppata piariissapput. Sisimiut aamma Kangerlussuup akornanni aqqusinniornissamut aningaasaliisussat eqqortut nassaarinissaannut piffimmilu takornariaqarnerup ineriartortinnissaanut tamatuma periarfissaqartippaa, Kangerlussuarmi mittarfik taamaalilluni ingerlateqqinneqarsinnaassammat, Kim Kielsen Sermitsiaq.AG-mut oqarpoq.
- Tamatuma ingerlanerani takornariaqarnerup pitsaassutsimut naammattumut ineriartortinneqarnera sivisunerunissaa paasinarsissagaluarpat, mittarfik nammineersinnaanngornissaata tungaanut isumagerusussinnaavarput, partiimi siulittaasoq naqissusiivoq.